Erdogan u bën thirrje turqve të mos përdorin dollarin dhe euron

Presidenti i Turqisë, Rexhep Taip Erdogan ka përsëritur thirrjet e tij që turqit të shesin dollarët dhe eurot, me qëllim që të përkrahin monedhën kombëtare, vlera e së cilës ka rënë, për shkak të përkeqësimit të marrëdhënieve me Shtetet e Bashkuara, raporton RFE.

Duke folur para mbështetësve në qytetin Unye, Erdogan gjithashtu tha se është për keqardhje që Shtetet e Bashkuara po zgjedhin Andrew Brunson – një pastor amerikan që po gjykohet në Turqi nën akuzat për terrorizëm – përpara se të zgjedhin si aleat strategjik Ankaranë.

Presidenti i Shteteve të Bashkuara, Donald Trump ka kërkuar lirimin e pastorit. Kjo është vetëm njëra nga çështjet për të cilën Washingtoni dhe Ankaraja nuk pajtohen.

Më 10 gusht, Trump njoftoi se ka autorizuar dyfishimin e tarifave për çelik dhe alumin, që vijnë nga Turqia.

Pastori Brunson, që mbahet nga autoritetet turke që nga viti 2016, përballet me 35 vjet burgim, nëse gjendet fajtor nën akuzat se ka ndihmuar separatistët kurdë dhe një grup që Erdogani e akuzon se qëndron prapa puçit të dështuar ushtarak të vitit 2016.