Shkup, studentët në protestë, kërkojnë provimin në gjuhën shqipe

Studentët shqiptarë në Shkup sot do të protestojnë sërish me kërkesën që provimi i jurisprudencës të mundësohet të jepet edhe në gjuhën shqipe, me moton “Bashkohuni me studentët – të gjithë një zë”.

Protesta do të mbahet para Urës së Gurit me fillim në orën 16:30, ndërsa organizatorët u kanë bërë thirrje artistëve, sportistëve dhe figurave të tjera publike që të ju bashkëngjiten.

“Të nderuar sportistë, artistë dhe figura publike, ju që me sukseset, talentin dhe punën tuaj keni bërë krenar çdo shqiptar, sot studentët kanë nevojë për zërin dhe mbështetjen tuaj.

Kjo protestë nuk është kundër askujt. Është protestë për mbrojtjen e gjuhës shqipe, dinjitetit dhe të drejtave tona si qytetarë të barabartë. Të hënën, më 18 Maj, në ora 16:30, duke filluar nga Ura e Gurit në Shkup, ejani të protestojmë bashkë. Në krah të studentëve, në krah të shqiptarëve,” thonë studentët shqiptarë duke përfunduar apelin: 

– Studentët kanë nevojë për mbështetjen tuaj;

– Protestë për mbrojtjen e gjuhës shqipe;

– Ejani të protestojmë së bashku.

Ndryshe, protesta e sotme është e dyta me radhë që organizojnë studentët shqiptarë dhe vjen si pasojë e refuzimit të kërkesës së tyra nga ana e ministrit të Drejtësisë.

Nga ana tjetër, AlSat raporton se Kryeministri Mickoski po shqyrton mënyra për të adresuar kërkesën e studentëve shqiptarë, që provimi i jurisprudencës të zhvillohet në gjuhën shqipe. Ekzekutivi, tha ai, po punon për një zgjidhje të mundshme dhe paralajmëroi se së shpejti do të prezantohet një propozim konkret lidhur me këtë çështje.