Kosovë, arrestohen shtatë serbë

Shtatë serbë arrestohen në Kosovë nën dyshimet për cenim të vullnetit të lirë të votuesve. Arrestimet janë kryer në komunën e Graçanicës. Reagime nga Lista Srpska.

Shtatë serbë të Kosovës u arrestuan nga policia nën dyshimet për “kërcënime, presion dhe shantazh” ndaj vullnetit të lirë të votuesve. Njoftimin e bëri të ditur ministri i Punëve të Brendshme të Kosovës, Xhelal Sveçla, i cili tha se arrestimet janë kryer në komunën e Graçanicës, vendbanim ky i banuar me shumicë serbe jo larg Prishtinës.

Edhe Prokuroria Themelore në Prishtinë tha se personat e ndaluar, shtetas të Republikës së Kosovës, të nacionalitetit serb, “të njëjtit dyshohen për kryerjen e veprës penale ‘Cenimi i përcaktimit të lirë të votuesve’ nga neni 210 i Kodit Penal të Republikës së Kosovës”. Ministri i Punëve të Brendshme, Xhelal Sveçla, ndërkaq, shkroi se “akte të tilla, që targetojnë drejtpërdrejt qytetarët e komunitetit serb në Kosovë, burojnë nga direktiva të orkestruara nga Serbia, të cilat cenojnë pluralizmin politik dhe rendin demokratik në vendin tonë”.

Rashiç: Presion dhe frikë nga Lista Srpska

Këto arrestime ndodhën pasi ministri në detyrë në Qeverinë e Kosovës, Nenad Rashiç, akuzoi publikisht Listën Srpska, parti kjo që e ka mbështetjen e Beogradit, për “presion” dhe “frikësim” ndaj mbështetësve të tij, duke u bërë thirrje institucioneve kompetente të Kosovës që të reagojnë.

Nenad Rashiç është lider i partisë serbe “Për Liri, Drejtësi dhe Mbijetesë”, që merr pjesë në zgjedhjet në Kosovë dhe që dy mandate ishte pjesë e Qeverisë së Kosovës. Ai tha se drejtorët që punojnë në institucionet paralele serbe në komunën e Graçanicës, të emëruar nga Lista Srpska, po largojnë nga puna qytetarë serbë që nuk e mbështesin Listën Srpska.

“Rreth 20 persona që nuk e mbështesin Listën Srpska, janë larguar nga puna dhe se në periudhën e ardhshme pritet që edhe rreth 40 persona të tjerë të marrin vendime për largim nga puna vetëm në territorin e komunës së Graçanicës”, tha Rashiç në një mbledhje të qeverisë, duke pretenduar se “simpatizantët dhe anëtarët e partisë së tij po ndalohen edhe në pikat kufitare me Serbinë nga Agjencia e Sigurisë dhe Informacionit të Serbisë, BIA, ku pyeten se për kë do të votojnë në zgjedhjet e jashtëzakonshme parlamentare të 7 qershorit në Kosovë”.

Lista Srpska: Po kryhet integrim i dhunshëm i institucioneve

I menjëhershëm ishte reagimi i Listës Srpska, e cila tha se në komunën e Graçanicës “janë arrestuar drejtorë të institucioneve shëndetësore dhe arsimore” dhe se me këtë “po kryhet integrim i dhunshëm i institucioneve shëndetësore dhe arsimore”. Këto institucione serbe funksionojnë akoma nën sistemin e Serbisë, por që nga autoritetet e Kosovës cilësohen struktura paralele serbe.

“Këto arrestime nuk kanë asnjë lidhje me zgjedhjet, kjo është një përpjekje për të sulmuar shëndetësinë dhe arsimin serb dhe, nga ana tjetër, nëse flasim për zgjedhjet, për t’i ndihmuar Nenad Rashiqit që me forcë t’i fitojë votat e popullit serb,” tha Igor Simiç nga Lista Srpska.

Zëvendëskryeministri dhe ministri i Punëve të Brendshme i Serbisë, Ivica Daçiq, tha se “të gjithë personat që me veprimet e tyre kanë kontribuar në arrestimin e serbëve në Graçanicë, drejtorë të institucioneve shëndetësore dhe arsimore të Republikës së Serbisë nga pjesa qendrore e Kosovës, do të ndiqen dhe sanksionohen në përputhje me ligjet e Republikës së Serbisë”.

Partia më e madhe e serbëve të Kosovës, Lista Srpska, që e ka mbështetjen e Beogradit zyrtar, në zgjedhjet e fundit në Kosovë, të mbajtura në dhjetor të vitit të shkuar, fitoi nëntë nga dhjetë vendet e rezervuara për serbët në parlamentin e Kosovës./DW/