KEDS gjobitet me 40.000 euro për matës elektronikë
Ministria e Industrisë, Ndërmarrësisë, Tregtisë dhe Inovacionit e Kosovës, MINTI, në mbledhjen e Këshillit për Mbrojtjen e Konsumatorit ku u prezantua edhe Draft Programi për Mbrojtjen e Konsumatorit 2026–2030, ka bërë të ditur se ndaj KEDS-it është shqiptuar gjobë në vlerë prej 40.000 euro për çështjen e matësve elektronikë të energjisë.
Sipas njoftimit nga MINTI, gjatë mbledhjes u prezantuan edhe informata nga Inspektorati Qendror i Mbikëqyrjes së Tregut, lidhur me monitorimin e çmimeve të derivateve, matësve elektronikë dhe produkteve të qumështit me bazë bimore.
Po ashtu u bë e ditur se po vazhdon verifikimi i matësve elektronikë të konsumatorëve që kanë paraqitur ankesa. Vetëm gjatë dy ditëve të fundit, në laboratorin e Agjencisë së Metrologjisë janë testuar 19 matës, prej të cilëve 7 kanë rezultuar pa afat të vlefshmërisë, ndërsa një është konstatuar pa lejim tipi.
Raportet zyrtare janë proceduar në Inspektoratin Qendror të Mbikëqyrjes së Tregut për ndërmarrjen e masave ligjore ndaj operatorit.
Ndryshe, Këshilli për Mbrojtjen e Konsumatorit ka diskutuar gjithashtu për adresimin e rasteve dhe mënyrat e kompensimit të dëmit ndaj konsumatorëve, ndërsa MINT ka theksuar se gjatë tre muajve të fundit është shënuar rritje prej 35 për qind e ankesave të qytetarëve krahasuar me vitin e kaluar.
