Luginë, kujdes nga Thaçi dhe Meta!

Debati rreth ndarjes, shkëmbimit ose korrigjimit të kufirit të Kosovës me Serbinë është futur në një hulli që rrezikon vetëm shqiptarët e Kosovës lindore, ose siç njihet Lugina e Preshevës.

Me idenë e hedhjes së një shashke në tryezën e bisedimeve përballë Serbisë nga ana e Hashim Thaçit, ku tashmë Aleksandar Vuçiç është rikthyer me ndihmën e Prishtinës zyrtare si një “paqedashës” në negociata, Thaçi me ose pa dashje po rrezikon për herë të dytë popullsinë shqiptare në Luginën e Preshevës.

Që tragjedia të jetë edhe më e madhe për këtë popullsi të pambrojtur shqiptare ndonëse mendon se ka “dy shtete amë”, debatin po e kalon në heshtje edhe Presidenti i Shqipërisë, gjithashtu për herë të dytë, në momentet më kritike për Luginën e Preshevës.

Por sot gjërat janë të qarta  si kristali dhe vetëm liderët e Luginës së Preshevës duhet të kenë kujdes!

Liderët e Luginës së Preshevës nuk duhet ta lejojnë Hashim Thaçin që për herë të dytë ti fus në luftë dhe ti braktisë, edhe pse rasti tashmë është më ordiner. Dhe ideja e Thaçit të mbështetet për herë të dytë nga Tirana zyrtare duke i braktisur sërish shqiptarët e Luginës!

Për luftën e vitit 1999, Thaçi së bashku me të gjithë shqiptarët që i ishin bashkuar UÇK-së, ishin betuar para flamurit për çlirimin e trojeve shqiptare. Kur u çlirua Kosova, Thaçi dhe jo vetëm, u arsyetuan me pretekstin e presionit ndërkombëtar dhe shqiptarët e Luginës së Preshevës u lanë në mëshirën e fatit, për të vazhduar luftën me Serbinë. UÇPMB bëri përpjekjet e fundit për të çuar betimin deri në fund, por të tradhtuar nga Prishtina dhe Tirana zyrtare, u detyruan ti japin fund kësaj lufte të pabarabartë, jo siç e kishin menduar!

Por vrasja e Ridvan Qazimit i njohur si Komandant Lleshit në sy të ndërkombëtarëve dhe heshtja e Prishtinës dhe Tiranës zyrtare, ose Hashimit si shef i kryeministrit të Kosovës dhe Ilir Metës si kryeministër i Shqipërisë, ishin një leksion i mirë për shqiptarët e Luginës së Preshevës, për sot dhe mot. Nëse kësaj i shtojmë edhe përdhosjen e lapidarit të UÇPMB-së dhe së fundi edhe shoqërimin me heshtje, të “arrestimit” të librave në gjuhën shqipe nga Aleksandar Vuçiç, situata bëhet edhe më e qartë.

Sot Hashim Thaçi bënë një deklaratë publike, që krahasuar me betimin është një nul, por që e fut në lojë kot Luginën e Preshevës. Kjo e fundit, duke jetuar nën një regjim kriminal edhe mund ta mendoj shkëmbimin e territorit si zgjidhje, por jo duke analizuar ato që mendon Presidenti tradhtar i Kosovës, por çfarë mendon Serbia dhe Presidenti i saj Aleksandar Vuçiç.

Vetëm një injorant politik dhe kombëtar mund të mendoj se Serbia e shkëmben Luginën e Preshevës me veriun e Kosovës. Arsyet gjeopolitike janë të shumta!

Nëse Presidentit të Kosovës, Hashim Thaçi dhe këshilltarëve të tij ordiner me në krye Batonin, i shkon nëpër mend se Serbia e jep Luginën e Preshevës, atëherë  gjëja e parë që duhet të bëjnë liderët e Luginës së Preshevës është ta shohin veten në pasqyre. Më pas, jo të lexojnë histori dhe të këndojnë këngë me çifteli, por ta marrin dhe ta shikojnë hartën e Ballkanit, aty ku ndodhet Lugina e Preshevës. Nëse në këtë moment binden, se Aleksandar Vuçiç do ti jap Luginën, Hashim Thaçit, për ti kërkuar nesër leje për të lëvizur nëpër boshtin ortodoks Beograd-Athinë, atëherë me urgjencë duhet ti drejtohen psikologut!

Nëse kësaj i shtojmë edhe faktin se veriun e Kosovës e kontrollon Aleksandar Vuçiç dhe jo ROSU me përrallat e Hashimit, atëherë situata bëhet tragjikomike.

Shqiptarët e Luginës së Preshevës duhet ta dijnë se kur ndërkombëtarët thonë JO, ROSU dhe forcat e tjera të Hashimit nuk guxojnë të shkojnë as në jug të Mitrovicës, dhe të mos flasim për Veri!

Në fund, dëshmitarë të shpërbërjes së Jugosllavisë ishin edhe liderët aktual të Luginës së Preshevës. Të humburit e vetëm të kësaj tragjedia që shkaktoi Serbia ishin boshnjakët. Ishte një dhe mbeti arsyeja e vetme: pranuan  të bisedojnë për territore dhe korrigjimin e hartës. Sot forma zyrtare në hartë e Republikës Srpska është uluritëse, pavarësisht se është rezultat i një kompromisi në tavolinë. Sepse sot për të shkuar në tokën boshnjake, ngado që të biesh duhet të kalosh tashmë nëpër tokën serbe.

Këto fakte Hashim Thaçi i ka injoruar dhe flet broçkulla, por shqiptarët e Luginës së Preshevës janë në kohë, jo vetëm për ti thënë JO lojërave të Thaçit, por edhe për analizuar hartën aktuale të Kosovës. Ngado që ti biesh, kufiri është i kontrolluar nga Serbia. Madje edhe pjesën më të madhe nga Shqipëria, jo vetëm pse Ahtisaari i dha lirinë absurde të lëvizjes dhe pronës, Kishës Serbe, por se në pjesën tjetër ku goranët e menaxhuar nga Beogradi zyrtar kanë vazhduar të jetojnë, nuk e kanë arsyen e vetme linjën direkte të autobusit Dragash-Beograd, por se strategjia e Serbisë është po ajo që ishte me përfundimin e luftës në Bosnje Hercegovinë.

Sot, shqiptarët e Luginës së Preshevës kanë vetëm një zgjidhje, nëse nuk dëshirojnë të futen për herë dytë në luftë me Serbinë vetëm pse Hashim Thaçi i çon dhe Ilir Meta e miraton me heshtjen e tij olimpike deri më sot.

Hashim Thaçi në vitin 1999 nuk shkoi të jetoj as në Preshevë, as në Bujanoc e lëre më Medvegjë, madje nuk është dëgjuar se ka marrë ndonjë refugjat i cili u dëbua nga shtëpia e tij, nën armën e ushtrisë serbe; Aq më pak Ilir Meta!

Kështu do të ndodhë edhe sot pavarësisht vendimit të të liderëve politik shqiptar që u emocionuan nga premtimet e Hashim Thaçi, sikur edhe të kenë garanci ndërkombëtare se të paktën Presheva do të futet në pazar. Përvoja me këta dy njerëz jep garanci se ata do të mbeten sërish në luftë sido që të ndodhë, dhe alarmi ka vetëm një klithmë:

Luginë, kujdes nga Thaçi dhe Meta!