Proces shembullor, Berisha: I ftoj të gjithë demokratët të përmbushin këtë detyrim statutor!
Duke e vlerësuar procesin shembullor, Kryetari i Partisë Demokratike, Sali Berisha, pas votoi duke përmbushur kështu detyrimin statutor, tha se në mënyrën më demokratike referendare i shprehin besimin, ose shprehin vullnetin për kryetarin apo dhe kundër tij.
“Përshëndes të gjithë demokratët dhe demokratet që kanë votuar gjer tani në mbarë Shqipërinë në një proces shembullor.
Në një proces në të cilin në mënyrën më demokratike referendare i shprehin besimin, ose shprehin vullnetin e tyre për kryetarin apo dhe kundër tij.
Me këtë rast ftoj të gjithë demokratët e tjerë që nuk kanë votuar të përmbushin këtë detyrim të rëndësishëm statutor,” tha Sali Berisha pasi përmbushi detyrimin statutor të votimit ndërsa u zotua:
“Të përmbushin këtë detyrim të rëndësishëm ndaj një procesi më demokratik që ekziston në të gjitha partitë moderne evropiane dhe botërore, në një pjesë të tyre më falni se janë pakicë, shumica përdorin procedura të tjera duke përfshirë edhe vetëm duartrokitjen në sallë për zgjedhjen e kryetarit.
I garantoj, i garantoj se do të përmbush me përkushtim të madh detyrimet e mia ndaj besimit të tyre, ndaj qëndrimeve të tyre.”
Ndryshe, në 87 qendra votimi të 77 degëve të Partisë Demokratike, KOKOE ka bërë të ditur se deri në orën 11 kanë votuar 11.906 votues nga 51.737 anëtarë të PD.
Procesi i votimit nisi që në orën 08:00 dhe do të përfundojë në orën 18:00. Këtë vit, ndryshe nga proceset e fundit zgjedhor, votat do të numërohen në degë dhe jo në selinë qendrore.
