SPAK kërkoi pushimin e hetimeve, GJKKO kthen dosjen e ish-kreut të Prokurimeve, Jonaid Myzyraj

Gjykata e Posaçme kundër Korrupsionit dhe Krimit të Organizuar, GJKKO, ka vendosur të mos pranojë kërkesën e SPAK për pushimin e hetimeve ndaj ish-kreut të Komisioni i Prokurimit Publik, Jonaid Myzyraj.

SPAK kërkoi pushimin e hetimit për një nga episodet penale ku Jonaid Myzyraj akuzohej për “shkelje të barazisë në tendera”, por GJKKO vendosi të mos e pranojë kërkesën dhe ta kthejë dosjen në SPAK, duke i lënë 45 ditë kohë Strukturës së Posaçme për kryerjen e një akt-ekspertimi.

Akuza ka të bëjë me tenderin për mirëmbajtjen e aksit rrugor Shpal-Ura e Repsit me gjatësi totale 58.7 km dhe me vlerë 2.29 milionë euro.

Për këtë procedurë prokurimi krahas Jonaid Myzyrajt, u morën të pandehur edhe 10 persona të tjerë, 7 prej të cilëve të akuzuar për shkelje e barazisë në tendera publikë, kryer në bashkëpunim.