Në vendet e Ballkanit vazhdojnë përgatitjet për Kurban Bajramin

Besimtarët myslimanë vazhdojnë me blerjen e produkteve të ndryshme, por edhe për përgatitjen e kurbanit, simbolit të Kurban Bajramit

Në prag të festës së Kurban Bajramit besimtarët myslimanë në vendet e Ballkanit vazhdojnë përgatitjet për pritjen e festës, raporton Agjencia e lajmeve Anadolu.

Besimtarët vazhdojnë me blerjen e produkteve të ndryshme, por edhe për përgatitjen e kurbanit, simbolit të Kurban Bajramit.

Tregu “Pazari i Ri” në Tiranë, në prag të festës së Kurban Bajramit është më i frekuentuar, ku qytetarët blejnë produktet nga më të ndryshmet, ndërkohë edhe tregjet në qytete e tjera të vendit presin besimtarët.

Besimtarët myslimanë përgatitje kanë bërë edhe për therjen e kurbaneve, ku prej ditësh bëhen përgatitjet për blerjen e kurbanit.

Manifestimi qendror për Kuban Bajramin në Shqipëri do të mbahet në Bulevardin “Dëshmorët e Kombit” në Tiranë.

Përgatitjet për pritjen e Kurban Bajramit vazhdojnë edhe në Maqedoninë e Veriut.

Në tregun e gjësë së gjallë në kryeqytetin Shkup, vërehet në ditët e fundit frekuentim më i lartë nga qytetarët, të cilët blejnë kurbanet.

Gjithashtu Çarshia e Vjetër dhe tregu i Bit Pazarit në Shkup janë plot me njerëz që blejnë ëmbëlsira, dhurata dhe produkte të ndryshme.

Pikat kufitare në Kosovë janë përballur me fluks në rritje të mërgimtarëve që kanë ardhur për ta kaluar festën pranë familjarëve

Edhe qytetarët e besimit Islam në Kosovë po bëjnë përgatitjet e fundit në prag të festës së Kurban Bajramit.

Ditët e fundit, pikat kufitare në Kosovë janë përballur me fluks në rritje për shkak të mërgimtarëve që kanë ardhur për ta kaluar festën pranë familjarëve në vendlindje.

Po ashtu, nevoja për blerjen e ushqimeve dhe produkteve të tjera për festë ka shtuar lëvizjen nëpër qytete, sidomos në kryeqytet.

Në tregun e gjësë së gjallë në afërsi të fshatit Bardhosh në Prishtinë, shitësit thonë se interesimi për blerjen e kurbaneve mbetet i konsiderueshëm, ndonëse çmimet kanë shënuar rritje krahasuar me vitet e kaluara.

Çmimi i një kurbani sivjet sillet rreth 200 euro, ndërsa në varësi të madhësisë dhe peshës, disa shiten edhe më shtrenjtë.

Përveç tregut të gjësë së gjallë, qytetarë të shumtë frekuentojnë edhe tregjet e fruta-perimeve, marketet dhe pastiçeritë për t’u furnizuar për festën.

Manifestimi qendror për territorin e Kosovës, kushtuar festës së Kurban Bajramit, mbahet tradicionalisht në “Xhaminë e Madhe” në Prishtinë, ku mesazhin e festës e përcjell Myftiu i Kosovës, Naim Tërnava.

Përgatitjet vazhdojnë edhe në vendet e tjera të Ballkanit./AA/