Rikualifikimi i Pallatit të Kongreseve, Rama: Ka probleme serioze! Koha për transformim

Pallati i Kongreseve përballet me probleme serioze që kërkojnë ndërhyrje, ndërsa projekti synon ta sjellë ndërtesën në standardet bashkëkohore të teknologjisë, funksionalitetit dhe cilësisë së hapësirave, tha Kryeministri Edi Rama gjatë prezantimit të Konkursit Ndërkombëtar për Rikualifikimin e Pallati i Kongreseve, ku theksoi nevojën për një transformim të thellë të godinës, duke ruajtur identitetin e saj.

“Ndërtesa ka probleme serioze për të adresuar, është koha vërtet për një transformim, duke ruajtur identitetin e saj. Natyrisht thirrja në bashkëpunim e sipërmarrjes nënkupton dhe zhvillimin e një objekti apo një terësie objektesh pranë pallateve të kongreseve,” tha Edi Rama duke folur dhe për qëllimin përfundimtar që Pallati i Kongreseve të mos mbetet një hapësirë e izoluar që gjallërohet vetëm gjatë aktiviteteve të veçanta, por të shndërrohet në një destinacion të përhershëm për jetën kulturore dhe turistike të kryeqytetit.

“Ky pallat të vijë në kohë nga pikëpamja e teknologjisë, nga pikëpamja e cilësisë së hapësirave, nga pikëpamja e gjithë strukturës së riorganizuar dhe riangazhuar cilësisht, por edhe që ky pallat dhe kjo zonë të bëhet një destinacion tjetër i Tiranës turistike, i Tiranës së aktiviteteve kulturore, duke mos e lënë një ishull të heshtur kur nuk ka një aktivitet brenda, duke krijuar jetë siç kemi krijuar jetë rreth stadiumit.”