Mbi 1.6 milionë fletëvotime gati për zgjedhjet e 7 qershorit

Komisioni Qendror i Zgjedhjeve i Kosovës ka finalizuar përgatitjet kryesore logjistike për zgjedhjet e parakohshme parlamentare që do të mbahen më 7 qershor. Sipas KQZ-së, mbi 1.6 milionë fletëvotime janë përgatitur për procesin zgjedhor brenda vendit, ndërsa shpërndarja e tyre në qendrat komunale do të nisë të shtunën, 6 qershor.

Zëdhënësi i KQZ-së, Valmir Elezi, bëri të ditur se fletëvotimet e shtypura në Sloveni tashmë janë vendosur në Qendrën e Numërimit dhe Rezultateve dhe janë gati për t’u shpërndarë sipas planit operativ.

“Sipas vendimit të KQZ-së, për zgjedhjet e 7 qershorit janë shtypur 1 milionë e 778.300 fletëvotime. Nga ky numër, 1 milion e 605.000 janë të planifikuara për votimin në vendvotimet e rregullta, 19.450 për votimin me kusht, 13.500 si rezervë dhe 3.500 për personat me nevoja të veçanta,” tha Valmir Elezi.

Edhe këtë herë, tha zëdhënësi i KQZ-së, numri i fletëvotimeve është më i vogël se numri i përgjithshëm i votuesve, duke u bazuar në analizat e pjesëmarrjes së qytetarëve në proceset e kaluara zgjedhore.

“Këto fletëvotime aktualisht ndodhen në Qendrën e Numërimit dhe Rezultateve. Të shtunën në mëngjes do të bëhet shpërndarja e tyre në Qendrat Komunale të Numërimit, ndërsa të dielën në mëngjes do të dërgohen në qendrat e votimit.”

Sa i përket votimit jashtë vendit, Valmir Elezi njoftoi se janë shtypur 108.000 fletëvotime për votimin me postë dhe 28.850 për votimin në përfaqësitë diplomatike të Kosovës.

“Fletëvotimet për votimin me postë janë dërguar në adresat e votuesve të regjistruar, ndërsa materialet zgjedhore për përfaqësitë diplomatike tashmë janë nisur drejt destinacioneve ku më 6 qershor do të zhvillohet procesi i votimit”, u shpreh ai.

Sipas KQZ-së, votimi në përfaqësitë diplomatike do të organizohet në 30 misione diplomatike në 18 shtete të botës, ku janë regjistruar 27.724 votues. Ndërkohë, për votimin me postë janë regjistruar 104.488 qytetarë.

Ndërkohë Komisioni Qendror i Zgjedhjeve ka marrë vendim për akreditimin e grupit të dytë me 15.782 vëzhgues për vëzhgimin e zgjedhjeve të parakohshme për Parlamentin e Kosovës, të cilat do të mbahen më 7 qershor 2026.

Sipas KQZ-së, vëzhguesit e akredituar përfaqësojnë 15 subjekte politike, 8 organizata joqeveritare vendore, 3 organizata ndërkombëtare, 26 media vendore, 16 media ndërkombëtare dhe 4 përfaqësi diplomatike.

Në mbledhjen e kaluar, KQZ kishte akredituar grupin e parë me 761 vëzhgues, të cilët përfaqësonin 5 OJQ vendore, 1 organizatë ndërkombëtare, 13 media vendore, 7 media ndërkombëtare, 2 përfaqësi diplomatike dhe 1 institucion vendor.

Kështu, numri i përgjithshëm i vëzhguesve të akredituar për vëzhgimin e zgjedhjeve të parakohshme për Parlamentin e Kosovës, të cilat do të mbahen më 7 qershor 2026, ka arritur në 16.543 vëzhgues.

Sipas të dhënave të KQZ-së, vëzhguesit e akredituar përfaqësojnë: 15 subjekte politike – 14.925 vëzhgues; 13 OJQ vendore – 796 vëzhgues; 4 organizata ndërkombëtare – 130 vëzhgues; 39 media vendore – 457 vëzhgues; 23 media ndërkombëtare – 78 vëzhgues; 6 përfaqësi diplomatike – 90 vëzhgues; dhe1 institucion vendor – 67 vëzhgues.

Ndryshe, në ditën e zgjedhjeve, më 7 qershor, procesi i votimit do të zhvillohet në 949 qendra votimi me gjithsej 2.550 vendvotime. Numri i qytetarëve me të drejtë vote në Kosovë është 1 milion e 959.962.

KQZ vlerëson se të gjitha përgatitjet po zhvillohen sipas planit, me qëllim garantimin e një procesi zgjedhor të rregullt dhe transparent.