Presidenti Trump: Po të mos isha unë, sot Izraeli nuk do të ekzistonte!

Presidenti i Shteteve të Bashkuara, Donald Trump, ka hedhur poshtë pretendimet se kryeministri izraelit, Benjamin Netanyahu, e manipuloi atë për të nisur luftën kundër Iranit, duke këmbëngulur se vendimi ishte vetëm i tiji.

“Që ai të më mashtrojë mua? Epo, unë jam ai që e nisi atë”, u tha Trump gazetarëve në avionin presidencial Air Force One, duke përmendur si arsye se Iranit “nuk mund t’i lejohet të ketë armë bërthamore,” raporton Al Jazeera.

Presidenti amerikan ua atribuoi këto akuza kundërshtarëve politikë.

“Ata janë thjesht Budallokrat. Ata janë njerëz që nuk e dinë se çfarë po bëjnë,” tha Presidenti amerikan Donald Trump.

“Izraeli do të ishte i pari që goditet”
Presidenti Trump kujtoi se shqetësimi i tij për programin bërthamor të Iranit daton që në mandatin e tij të parë, kur SHBA u tërhoqën nga marrëveshja bërthamore e lidhur në vitin 2015 gjatë administratës së Barack Obamës. “Kjo është e rëndësishme për Izraelin, sepse ndoshta do të ishte i pari që do goditej,” tha Presidenti i SHBA, Donald Trump, duke përfunduar:

“Do t’ju them diçka, po të mos isha unë, sot Izraeli nuk do të ekzistonte.”