Kosovë, mbi 7 mijë pako me fletëvotime nga diaspora janë aprovuar nga KQZ-ja
Procesi i verifikimit të pakove me fletëvotime të ardhura përmes postës nga votuesit jashtë Kosovës po vazhdon në Qendrën e Numërimit dhe Rezultateve, QNR, ndërsa deri tani janë aprovuar mbi 7 mijë prej tyre.
Ndërkohë mësohet se është përmbyllur procesi i numërimit dhe verifikimit të votave të subjekteve politike dhe kandidatëve për deputetë në 13 komuna: Junik, Shtërpcë, Hani i Elezit, Partesh, Mamushë, Zubin Potok, Zveçan, Kllokot, Novobërdë, Obiliq, Shtime, Ranillug dhe Mitrovicë e Veriut.
Zëdhënësi i Komisioni Qendror i Zgjedhjeve, Valmir Elezi, bëri të ditur se deri sot në orën 10:00 janë shqyrtuar gjithsej 7 mijë e 295 pako të supozuara me fletëvotime. Sipas tij, 7 mijë e 153 prej tyre janë aprovuar, ndërsa 142 janë refuzuar.
Valmir Elezi ka sqaruar se arsyeja më e shpeshtë për refuzimin e pakove ka qenë mungesa e dëftesës së regjistrimit, dokument i cili përmban të dhëna unike dhe u dërgohet votuesve të regjistruar për votim me postë.
“Vetëm për këtë arsye janë refuzuar 114 pako,” tha Elezi dhe pas përfundimit të procesit të verifikimit, KQZ do të publikojë numrin përfundimtar të pakove që do t’i nënshtrohen numërimit në QNR.
Ndërkohë, më 8 qershor është përmbyllur procesi i tërheqjes së pakove me fletëvotime nga votimi jashtë vendit. KQZ-ja njoftoi se pakot janë mbledhur nga 23 kuti postare të vendosura në 22 shtete, si dhe nga Kosova.
Sipas të dhënave zyrtare, nga këto kuti janë tërhequr mbi 85 mijë e 700 pako të supozuara me fletëvotime, të cilat po transportohen dhe verifikohen në Kosovë.
Gjatë periudhës së regjistrimit, janë regjistruar gjithsej 104.480 qytetarë për të votuar përmes postës në zgjedhjet e parakohshme, ndërsa më shumë se 20 mijë të tjerë e kanë shfrytëzuar mundësinë e votimit në përfaqësitë diplomatike të Kosovës.
Ndryshe, votat e diasporës për zgjedhjet e parakohshme parlamentare të 7 qershorit, pritet të jenë përcaktuese për formimin e institucioneve të reja të Kosovës.
Përfundon procesi i numërimit dhe verifikimit të votave në 13 komuna
Komisioni Qendror i Zgjedhjeve, KQZ, ka njoftuar sot se procesi i verifikimit të rezultateve të subjekteve politike dhe numërimit të votave për kandidatët për deputetë nga zgjedhjet e parakohshme parlamentare të 7 qershorit po vazhdon në Qendrat Komunale të Numërimit, QKN, dhe deri në orën 09:00 të ditës së sotme është përmbyllur procesi i numërimit dhe verifikimit të votave në 13 komuna të vendit: Junik, Shtërpcë, Hani i Elezit, Partesh, Mamushë, Zubin Potok, Zveçan, Kllokot, Novobërdë, Obiliq, Shtime, Ranillug dhe Mitrovicë e Veriut.
Zëdhënësi i KQZ-së, Valmir Elezi, ka njoftuar se deri tani janë procesuar 1.379 nga 2.498 vendvotime në të gjithë vendin, ose 55.20 për qind e numrit të përgjithshëm.
“Procesi i numërimit dhe verifikimit po vazhdon në 25 Qendra Komunale të Numërimit, përfshirë komunat me numrin më të madh të vendvotimeve si Prishtina, Prizreni, Ferizaj, Gjakova, Peja, Gjilani dhe Podujeva”, tha Elezi.
Valmir Elezi tha se rezultatet e secilit vendvotim publikohen menjëherë pas përfundimit të numërimit dhe verifikimit. “Pas përfundimit të numërimit të çdo vendvotimi, rezultatet transmetohen në platformën zyrtare të rezultateve, duke mundësuar publikimin e tyre në kohë reale,” tha Elezi.
Numërimi i votave për kandidatët për deputetë dhe verifikimi i formularëve të rezultateve po zhvillohet në kuadër të administrimit të zgjedhjeve të parakohshme për Parlamentin e Kosovës, të mbajtura më 7 qershor 2026.
