Shmangni turmat! Pesë ishuj europianë më pak të njohur që ia vlen të vizitoni

Zëvendësoni destinacionet e mbipopulluara me brigje më të qeta në këta ishuj më pak të njohur, ku do të gjeni peizazhe mahnitëse, jetë autentike lokale dhe më pak turistë se në ishujt e tyre të famshëm fqinjë.

Ishujt e Evropës i kanë magjepsur udhëtarët prej shekujsh, nga brigjet mesdhetare të përmbytura nga dielli deri te formacionet shkëmbore të ashpra të shpërndara në Atlantikun e Veriut.

Ndërsa shumë prej ishujve më të njohur të kontinentit tërheqin turma të mëdha çdo verë, ka ende plot destinacione më të qeta që presin të zbulohen.

Ishuj si Tenerife, Santorini dhe Capri janë të famshëm me të drejtë, por njëkohësisht njihen edhe për mbipopullimin turistik. Duke zgjedhur një ishull më të vogël dhe më pak të njohur, mund të shijoni po ato peizazhe të bukura dhe atmosferën e çlodhur, por me më pak gjasa për t’u përballur me turma apo çmime të fryra kudo që shkoni.

Këta janë disa nga ishujt më të mirë dhe më pak të njohur të Evropës që ia vlen t’i eksploroni tani.

Zëvendësoni Tenerifen me La Gomerën

La Gomera, ishulli i dytë më i vogël ndër ishujt kryesorë të arkipelagut spanjoll të Ishujve Kanarie, ndodhet shumë pranë Tenerifes, por në shumë aspekte duket sikur është një botë krejt tjetër.

Ndërsa Tenerife, ishulli më popullor i arkipelagut, tërheq rreth pesë milionë vizitorë në vit, La Gomera pret shumë më pak turistë, pjesërisht sepse infrastruktura e saj nuk është përshtatur për turizmin masiv.

Megjithatë, ishulli ka shumë për të ofruar, veçanërisht për ata që kërkojnë aventura.

La Gomera është e famshme për malet e saj vullkanike, të përshkuara nga shtigje ecjeje. Parku Kombëtar Garajonay, i përfshirë në listën e UNESCO-s, strehon një nga pyjet me re më mbresëlënëse të Evropës, si edhe grykën e mrekullueshme Valle Gran Rey.

Plazhet me rërë të zezë janë ndër vendet që duhen parë patjetër, ndërsa kaktusët e lulëzuar gjenden kudo.

Mos lini pa provuar specialitetet vendëse, si almogrote, një krem i pasur dhe pikant me djathë dhie, si edhe prodhimet e detit tepër të freskëta. Toni i verdhë është një nga më të preferuarit.

Zëvendësoni Hvarin me Šoltën

Šolta ndodhet përballë Splitit, megjithatë shpesh lihet në hije nga ishujt fqinjë më të njohur, Hvari dhe Brači. Ishulli arrihet në më pak se një orë me tragetet e rregullta, duke e bërë një nga arratisjet ishullore më të lehta dhe më të nënvlerësuara të Kroacisë.

Jeta këtu ecën me një ritëm më të qetë. Fshatrat e përgjumur të peshkatarëve, gjiret e veçuara me guralecë, ullishtat dhe vreshtat i japin ishullit një atmosferë autentike dalmate, e cila po bëhet gjithnjë e më e vështirë për t’u gjetur përgjatë Adriatikut.

Notoni në ujërat e famshme, të kaltra dhe të kristalta, më pas pushoni në një mjedis rustik dhe shëtisni në portin piktoresk të Stomorskës, që duket si i dalë nga një kartolinë.

Eksploroni fshatin e bukur të Maslinicës dhe uluni në një restorant buzë ujit për të shijuar një pjatë me prodhime deti të kapura po atë ditë.

Zëvendësoni Santorinin me Serifosin

Serifosi ofron gjithçka që udhëtarët duan te ishujt e Cikladeve, por pa turmat që tashmë janë bërë tipar dallues i Santorinit.

I arritshëm me traget nga Athina për rreth dy orë, ky ishull me atmosferë të qetë deri më tani i ka shpëtuar turizmit masiv, falë mungesës së një aeroporti dhe resorteve të mëdha.

Në vend të tyre, do të gjeni plazhe të qeta, fshatra me shtëpi të lyera me të bardhë dhe një ritëm më të ngadaltë jetese, çka e ka bërë prej kohësh Serifosin një nga destinacionet e preferuara të athinasve për arratisjet e fundjavës.

Me më shumë se 40 plazhe të shpërndara përgjatë vijës së tij të thyer bregdetare, ka hapësirë të mjaftueshme për të shijuar qetësinë. Ndërkohë, kryeqyteti Chora, i ngritur mbi kodër, është një labirint rrugicash gjarpëruese, kishash me kupola blu dhe mullinjsh tradicionalë me erë.

Ndërsa dielli nis të perëndojë, porositni një pije në një nga baret në tarracat e Chorës dhe shikoni Egjeun teksa merr nuanca të arta dhe rozë. Është përvoja tipike e një ishulli grek, por pa radhët për të realizuar fotografinë perfekte.

Zëvendësoni Caprin me Procidën

Capri është i famshëm në mbarë botën për restorantet, hotelet dhe klubet e plazhit tejet luksoze, por njihet gjithashtu edhe për çmimet marramendëse.

Megjithatë, në Gjirin e Napolit ka alternativa po aq të bukura dhe shumë më të përballueshme.

Procida ndodhet vetëm 40 minuta larg Napolit me traget dhe ofron gjithçka që e bën Caprin tërheqës: ujëra të kristalta, pamje mahnitëse, shtëpi me ngjyra të ndezura dhe kuzhinë italiane të shkëlqyer. Pavarësisht kësaj, ishulli mbetet relativisht pak i njohur dhe është shumë më i lirë se fqinji i tij, ndaj është vendi ideal për të ngadalësuar ritmin dhe për t’u çlodhur vërtet.

Fshati i peshkatarëve Marina di Corricella duhet parë patjetër, me ndërtesat e tij në nuanca pastel, që duken edhe më bukur kur shihen nga lart.

Numri i makinave në ishull është i kufizuar dhe shumica e turistëve vijnë nga pjesë të tjera të Italisë. Vizitorë të tjerë tërhiqen nga skenat e filmit të vitit 1999, The Talented Mr. Ripley, i cili u xhirua pjesërisht në ishull.

Provoni prodhimet e freskëta të detit, limoncellon e prodhuar në vend dhe spaghetti alla pescatora povera, një pjatë me makarona dhe açuge, emri i së cilës përkthehet si “spageti të peshkatarit të varfër”.

Zëvendësoni Ishullin Skye me Luingun

Luing, një ishull i vogël pranë bregut perëndimor të Skocisë, shpesh lihet në hije nga Skye më i njohur, por pikërisht kjo është pjesë e hijeshisë së tij. Vetëm 16 milje në jug të Obanit dhe i arritshëm me një udhëtim të shkurtër me traget nga ishulli Seil, ky ishull i Hebrideve të Brendshme është shtëpia e një komuniteti të lidhur ngushtë artistësh, zejtarësh dhe vetëm disa qindra banorësh.

Megjithëse është pak më shumë se gjashtë milje i gjatë, Luingu ka shumë për të ofruar. Shëtitjet panoramike përgjatë bregdetit hapin pamje të gjera nga deti, ndërsa Qendra e Ishujve të Atlantikut është vendi ideal për të mësuar më shumë rreth jetës në ishull.

Ai është gjithashtu një destinacion i ëndrrave për adhuruesit e natyrës së egër.

Vidrat shihen shpesh këtu, ashtu si fokat e portit dhe fokat e zakonshme. Në agim dhe në muzg mund të keni fatin të dalloni edhe delfinë, balena dhe marsuinë./Euronews/ Monitor/