Aksident fatal në rrugën Mitrovicë–Prishtinë, ndalohet një person

Pas një aksidenti të rëndë trafiku me pasoja fatale në rrugën nacionale Mitrovicë–Prishtinë, Prokuroria Themelore në Mitrovicë, Departamenti për Krime të Rënda, ka ndaluar një person të dyshuar për veprën penale “Ngasja në gjendje të paaftë apo të dehur”..

Aksidenti ka ndodhur mëngjesin e sotëm në fshatin Studime, në në rrugën nacionale Mitrovicë–Prishtinë, thekson Prokuroria përmes një njoftimi, ku i dyshuari, duke drejtuar automjetin në gjendje të dehur, ka hyrë në shiritin e kundërt të qarkullimit dhe është përplasur me një veturë tjetër.

Si pasojë e aksidentit, një grua ka humbur jetën, ndërsa drejtuesi i automjetit tjetër dhe tre pasagjerë kanë pësuar lëndime të rënda trupore. Të lënduarit janë dërguar për trajtim mjekësor në Qendrën Klinike Universitare të Kosovës, QKUK.

Në vendin e ngjarjes ka dalë prokurori kujdestar nga Departamenti për Krime të Rënda i Prokurorisë Themelore në Mitrovicë. Me urdhër të prokurorisë, trupi i pajetë i viktimës është dërguar për obduksion në Institutin e Mjekësisë Ligjore në Prishtinë.

Prokuroria Themelore në Mitrovicë ka bërë të ditur se, brenda afatit ligjor, do të paraqesë kërkesë për caktimin e masës së paraburgimit ndaj personit të ndaluar.

Përgjaket rruga nacionale Mitrovicë–Prishtinë

Ndryshe, Policia e Kosovës ka bërë të ditur se në aksidentin i cili është regjistruar rreth orës 05:00 në fshatin Studime dhe në të janë përfshirë dy automjete, një grua ka humbur jetën ndërsa disa persona të tjerë janë lënduar.

Zëdhënësi i Policisë së Kosovës, Daut Hoxha, ka bërë të ditur për media se si pasojë e përplasjes, një grua ka humbur jetën në vendin e ngjarjes, ndërsa disa persona të tjerë kanë pësuar lëndime trupore dhe janë dërguar për trajtim mjekësor.

Njësitet policore dhe ekipet emergjente kanë dalë menjëherë në vendin e aksidentit, ndërsa hetimet janë duke vazhduar për të sqaruar rrethanat dhe shkaqet që çuan deri te kjo ngjarje tragjike.