Policia dhe EULEX-i në Jabukë të Zubin Potokut

Pas gjetjes së mbetjeve mortore në një varr masiv në Kalludër të Zubin Potokut, pjesëtarët e Policisë së Kosovës së bashku me ata të EULEX-it, po qëndrojnë në fshatin Jabukë të Zubin Potokut, ku dyshohet për ekzistencën e një tjetër lokacioni të mundshëm të një varri masiv.

Në këtë lokacion ndodhet edhe ministri në detyrë i Punëve të Brendshme, Xhelal Sveçla, i cili po e përcjell nga afër situatën.

Mbrëmë Sveçla, bëri të ditur se pas zbulimit të varrit masiv në Kalludër të Zubin-Potokut, një tjetër lokacion me mbetje mortore është gjetur në fshatin Jabukë të kësaj komune.

“Pas gjetjes së mbetjeve mortore në një varr masiv në Kalludër të Zubin-Potokut, ku ende po vazhdojnë kërkimet dhe gjurmimet, sot, vetëm 10 kilometra më tutje, në fshatin Jabukë të po kësaj komune, u gjet edhe një varr tjetër masiv me mbetje mortore të viktimave të luftës së fundit në Kosovë. Falënderoj Policinë e Kosovës, njësitë përkatëse për hetimin e krimeve të luftës, Agjencinë e Kosovës për Inteligjencë, Institutin e Mjekësisë Ligjore dhe Prokurorinë e Kosovës për punën e ndërmarrë në drejtim të hulumtimit, hetimit dhe identifikimit të këtyre lokacioneve,” u shpreh Sveçla përmes rrjetit social Facebook duke shtuar se Serbia vazhdon të mbetet e njëjtë si në kohën e Milosheviçit.

“Vuçiç ishte numri dy i Sheshelit, Daçiç ishte numri dy i Milosheviçit e Vulin numri dy i Mira Markoviçit. Të tre këta janë ende në pushtet në Serbi dhe ky shtet nuk ka ndërruar asgjë. Serbia vazhdon të mbetet e njëjta në formë dhe në përmbajtje. Ky shtet, në njërën anë, refuzon të japë informacione për personat e zhdukur, të marrë me dhunë, ndërsa, në anën tjetër, kërcënon dhe burgos qytetarët e saj që bashkëpunojnë për gjetjen e këtyre varreve. Po ashtu, ajo glorifikon përmes memorialeve brigada si ajo 37, pjesëtarët e së cilës janë përgjegjëse për shumë masakra në Kosovë”, tha ai.

Ministri në detyrë i Punëve të Brendshme, Xhelal Sveçla, ka ftuar partnerët ndërkombëtarë të dënojnë dhe ndëshkojnë ashpër këtë sjellje të Serbisë ndërsa përfundon:

“Pa një gjë të tillë jo që do të jetë i pamundur çfarëdo hapi drejt të drejtësisë, por ky shtet do të cenojë çdo ditë paqen në Ballkanin Perëndimor. Megjithatë, pavarësisht kësaj, ne mbetemi të përkushtuar dhe të palëkundur për të gjurmuar çdo pëllëmbë, në mënyrë që të zbardhim fatin e secilit person të vrarë dhe zhdukur nga shteti serb gjatë luftës së fundit në Kosovë dhe të sjellim para drejtësisë secilin kriminel përgjegjës për krimet e asaj kohe.”