Bie besimi i biznesit, Banka e Shqipërisë: Përkeqësimi u përcaktua nga rënia e besimit në të gjithë sektorët

Treguesi i ndjesisë ekonomike ra me 1 pikë në muajin korrik. Sipas Bankës së Shqipërisë, përkeqësimi u përcaktua nga rënia e besimit në të gjithë sektorët e biznesit, veçanërisht në sektorët e ndërtimit dhe tregtisë. Ndërkohë, treguesi i besimit konsumator regjistroi rritje.

Vlera e treguesit të ndjesisë ekonomike megjithatë qëndron 5.4 pikë mbi mesataren afatgjatë.

Treguesi i besimit të industrisë ra lehtësisht me 0.8 pikë përqindje në muajin korrik, i ndikuar nga vlerësimet më pak optimiste për kontratat porositëse të eksportit. Niveli i treguesi qëndron rreth 8 pikë përqindje mbi mesataren e vet historike. Pritjet e bizneseve të këtij sektori për prodhimin, punësimin dhe çmimet në të ardhmen janë në rënie krahasuar me ato të një muaji më parë.

Treguesi i besimit në ndërtim ra me 4.6 pikë përqindje në muajin korrik. Megjithatë, ky tregues qëndron rreth 6 pikë përqindje mbi mesataren afatgjatë. Në rënien e treguesit ndikuan të dy komponentët: vlerësimi i bizneseve për aktivitetin ndërtues dhe porositë aktuale. Pritjet për çmimet në të ardhmen janë në rritje.

Treguesi i besimit në shërbime ra me 2.4 pikë përqindje. Niveli i treguesit megjithatë qëndron rreth 5.5 pikë përqindje mbi mesataren afatgjatë. Të dy komponentët përbërës të treguesit, ecuria aktuale e aktivitetit, si dhe niveli i kërkesës, kanë regjistruar rënie. Pritjet e bizneseve për çmimet në të ardhmen janë në rritje.

Treguesi i besimit në tregti u reduktua me rreth 3.2 pikë përqindje në muajin korrik, i ndikuar kryesisht nga vlerësime jo optimiste për ecurinë e biznesit. Edhe treguesi i punësimit në të ardhmen dha kontribut rënës në indeks por në masë më të ulët. Ndonëse në rënie, niveli i treguesit të besimit në tregti qëndron rreth 9 pikë përqindje mbi mesataren historike. Pritjet për çmimet në të ardhmen janë vlerësuar në rritje.

Treguesi i besimit konsumator regjistroi një vlerë më të lartë me rreth 2.2 pikë përqindjeje, duke qëndruar rreth 1.2 pikë përqindje mbi nivelin e mesatares historike. Konsumatorët vlerësuan lehtësisht me rritje të gjithë komponentët përbërës të treguesit: vlerësimin e situatës

ekonomike të vendit, situatën e tyre financiare në të ardhmen, si dhe blerjet në shuma të mëdha aktuale dhe në të ardhmen. Pritjet për nivelin e përgjithshëm të çmimeve në të ardhmen janë rishikuar për poshtë./Monitor/