Nesër seanca konstituive e Parlamentit të Kosovës, nuk ka marrëveshje LVV-LDK

Një ditë pas takimit treorësh të Kryetarit të Lëvizjes Vetëvendosje, Albin Kurti me Kryetarin e Lidhjes Demokratike të Kosovës, Lumir Abdixhiku, dhe, vetëm një ditë para seancës konstituive të Parlamentit, vazhdon të jetë e paqartë nëse palët do të arrijnë marrëveshje për formimin e institucioneve të reja.

Takimi i djeshëm përfundoi pa marrëveshje politike, megjithëse të dy liderët takimin e cilësuan konstruktiv dhe e lanë të hapur mundësinë e vazhdimit të komunikimit.

Kryeministri në detyrë, Albin Kurti, tha se Lëvizja Vetëvendosje mbetet e interesuar për bashkëpunim me LDK-në, por theksoi se çdo marrëveshje duhet të respektojë rezultatin e zgjedhjeve.

“Jemi të interesuar dhe të gatshëm të bashkëpunojmë me LDK-në, sepse vendi ka nevojë për progres të përshpejtuar,” tha Albin Kurti pas takimit duke e bërë të qartë se presidenti i ardhshëm duhet të jetë figurë jopartiake dhe konsensuale.

Ndërkohë, Kryetari i LDK-së, Lumir Abdixhiku, ritheksoi se partia e tij kërkon një marrëveshje gjithëpërfshirëse që përfshin tre shtyllat kryesore institucionale, Parlamentin, Qeverinë dhe Presidencën, ndërsa bëri të ditur se LDK nuk synon postin e Kryetarit të Parlamentit, duke e cilësuar atë si funksion ceremonial, dhe ishte i prerë se balanca institucionale duhet të jetë pjesë e çdo marrëveshjeje politike.

Ndryshe, seanca konstituive e Parlamentit është caktuar për të enjten e 6 Gushtit. Në mungesë të një marrëveshjeje politike, mbetet e paqartë nëse do konstituohen institucionet e reja, vendi do të hyjë sërish në një ngërç politik, ose që nesër do jetë e qartë nëse Kosova po shkon drejt zgjedhjeve të reja parlamentare.