Presidenti Trump kërcënon Iranin. Axios zbulon planin për Ngushticën e Hormuzit

Presidenti amerikan Donald Trump tha se Ngushtica e Hormuzit do të hapet shumë shpejt ose Irani do të pësojë një goditje të madhe.

“Po zhvillojmë bisedime shumë të mira,” tha presidenti amerikan, duke folur nga Kalifornia për Fox News ndërsa pretendoi se Irani dëshiron të arrijë një marrëveshje: “Kam kohë!”.

Sipas Axios, një portal amerikan i specializuar në politikë, ekonomi dhe siguri kombëtare, i njohur për burimet e tij të mira në Shtëpinë e Bardhë, tha se po diskutohet një marrëveshje e përkohshme 60 ditore për të rregulluar kalimin nëpër Ngushticë midis Iranit dhe Omanit.

Sipas Axios, kjo marrëveshje paraprake, e cila mund të shpallet që sot, përcakton që i gjithë trafiku detar që hyn në Ngushticë do të përdorë rrugën veriore përmes ujërave iraniane, dhe të gjitha anijet që largohen do të ndjekin rrugën jugore përmes ujërave të Omanit, pa paguar tarifa.

Gjatë kësaj periudhe 60 ditore, dhe deri në arritjen e një marrëveshjeje përfundimtare, seksioni i mesëm i ngushticës do të pastrohet nga minat, sipas Axios, i cili paralajmëron se kompromisi nuk është finalizuar ende.

“Ekziston mundësia që të arrijmë një marrëveshje sot ose nesër për të rihapur ngushticën dhe për të ecur drejt normalizimit”, tha dje Sekretari i Thesarit të SHBA-së, Scott Bessent, gjatë një interviste për CNBC.

Ndryshe, tensionet mbeten të larta në Ngushticë, e cila është bërë një fushë beteje kyçe në konfliktin e Lindjes së Mesme. Agjencia detare e Mbretërisë së Bashkuar, UKMTO, raportoi se një anije u godit nga një predhë e paidentifikuar.