Sot skadon afati për konstituim e Parlamentit të Kosovës

Sot skadon afati kushtetues për konstituimin e Parlamentit të Kosovës dhe nede nuk dihet se kur do të vazhdojë seanca e nisur dje për konstituimin e legjislaturës së 11-të. 

Dje, seanca u ndërpre me kërkesë të Kryetarit të Lëvizjes Vetëvendosje, Albin Kurti, pasi kërkoi kohë shtesë për diskutime me përfaqësues të partive, me synimin për të arritur marrëveshje për çështjen e presidentit.

Kërkesa e Kurtit u përcoll me reagime të deputetëve por kjo nuk e pengoi kryesuesin e seancës Avni Dehari, i cili është deputet i Vetëvendosjes, të ndërprej punimet e seancës. 

Ndryshe, para ndërprerjes së seancës u mbyllën dy pika të rendit të ditës, formimi i Komisionit për verifikimin e mandateve të deputeteve, dhe, Betimi i deputetëve. 

GLPS: S’ka hapësirë për justifikime

Grupi për Studime Juridike dhe Politike, GLPS, i ka bërë thirrje Lëvizjes Vetëvendosje, si subjekti fitues i zgjedhjeve dhe bartës i përgjegjësisë për propozimin e Kryetarit të Parlamentit, si dhe të gjitha partive parlamentare, që sot të ndërmarrin hapat e nevojshëm për konstituimin e Parlamentit.

Dështimi për ta konstituuar Parlamentin brenda afatit kushtetues, thekson GLPS, nuk do të ishte vetëm një papërgjegjësi politike por një dështim i papranueshëm institucional, një shkelje e hapur e kushtetutës dhe një mungesë e rëndë përgjegjësie ndaj qytetarëve të Kosovës.

“Sot nuk ka më hapësirë për justifikime, interpretime të gjëra politike apo shtyrje të mëtejshme. Ekziston vetëm një detyrim i qartë, konstituimi i Kuvendit brenda afatit kushtetues. Çdo dështim për ta përmbushur këtë obligim do të ishte shkelje e kushtetutës dhe një akt i papërgjegjshëm politik dhe institucional,” thekson GLPS përmes një komunikate duke e konsideruar të papranueshëm arsyetimin e LVV-së për ndërprerjen e seancës së djeshme me pretendimin se nevojitet kohë shtesë për diskutime lidhur me zgjedhjen e presidentit/es. 

“Çështja e Presidentit/es nuk mund të përdoret si justifikim për të pezulluar ose shtyrë përmbushjen e një obligimi kushtetues që ka afat të qartë dhe të detyrueshëm. Ky arsyetim është edhe më pak bindës duke pasur parasysh se partitë politike kanë pasur muaj të tërë në dispozicion për të zhvilluar dialog lidhur me zgjedhjen e Presidentit/es. Edhe vetë caktimi i seancës në ditët e fundit të afatit kushtetues u arsyetua me nevojën për t’u dhënë partive kohë të mjaftueshme për të zhvilluar këto diskutime. Për më tepër, pas ndërprerjes së seancës nuk u pa asnjë takim mes partive politike që do ta justifikonte këtë shtyrje,” thekson GLPS ndërsa sakton në fund se konstituimi i Parlamentit dhe formimi i Qeverisë me procesin e zgjedhjes së Presidentit nuk duhet të ngatërrohen. 

“GLPS rikujton se konstituimi i Kuvendit është parakusht për zgjedhjen e dy organeve tjera kushtetuese Qeverisë dhe Presidentit e të cilat kanë afate strikte kushtetuese. Procedura për zgjedhjen e Presidentit/es mund të zhvillohet brenda afatit prej 60 ditësh nga dita e konstituimit të Kuvendit. Duke qenë se mandati i Presidentes në detyrë përfundon më 5 tetor, çdo zvarritje vetëm sa e rrit rrezikun e një krize të re kushtetuese. Në të njëjtën kohë, ushtrimi i funksionit të Presidentit/es përtej përfundimit të mandatit kushtetues prej 6 muajsh do të përbënte tejkalim të mandatit kushtetues dhe cenim të drejtpërdrejtë të Kushtetutës.”