Gjenerali i dytë, Ambasador i SHBA në Ballkan
Pas konfirmimit nga Senati të Gjenerallejtënantit në pension, Eric Wendt, si Ambasadori i ri Shteteve të Bashkuara në Shqipëri, fundjavën e kaluar, sot Senati amerikan konfirmoi Gjeneralin në pension të marinës, Ronald Johnson, Ambasadori i ri i SHBA në Bosnje Hercegovinë.
Njoftimi zyrtar për Ambasadorin e ri të SHBA, Gjeneralin në pension të marinës, Ronald Johnson, ka mbërritur në Sarajevë, dhe tani pritet vetëm lëshimi i një marrëveshje që ai të marrë detyrën, kanë konfirmuar zyrtarët nga Bosnja dhe Hercegovina.
Konfirmimi nga Senati i Ambasadorit Johnson pas atij Wendt, shënon një ndryshim të rëndësishëm në përfaqësimin diplomatik të SHBA në Bsonje dhe Shqipëri, duke sjellë figura me profil ushtarak dhe përvojë në operacione ndërkombëtare.
Përveç gatishmërisë së Presidenc së Bosnje Hercegovinës për dhënien e pëlqimit si shtet pritës, shefi i diplomacisë boshnjake, Elemdin Konakoviç, shkoi tutje duke theksuar se është mirë që Johnson është një ushtar profesionist, dhe ai pret që për shkak të kësaj përvoje të jetë veçanërisht i interesuar në potencialin e industrisë ushtarake në Bosnje Hercegovinë, e cila mund të hapë rrugën për investime të reja.
“Ky emërim konfirmon se ne jemi ende interesantë për SHBA-në,” tha Elemdin Konakoviç.
Kush është Ronald Johnson?
SHBA-të nuk kanë pasur ambasador në Bosnje dhe Hercegovinë që nga fillimi i vitit 2025, kur skadoi mandati i Michael Murphy, një diplomat profesionist i emëruar gjatë administratës së Presidentit Joe Biden.
Që atëherë, ambasada është drejtuar nga i Ngarkuari me Punë John Ginkel, i cili ka qenë veçanërisht i përfshirë në zbatimin e projektit të tubacionit të gazit Southern Interconnection, dhe kjo punë i është besuar AAFS Infrastructure and Energy, një kompani e njohur si e afërt me administratën aktuale amerikane.
Johnson, i cili do të jetë ambasadori i parë amerikan në Bosnje dhe Hercegovinë pa përvojë profesionale diplomatike dhe bazuar në emërimin e administratës Donald Trump, njihet gjithashtu si një person nga rrethi i besnikëve të presidentit aktual të SHBA-së.
Ai e filloi karrierën e tij ushtarake në vitin 1980, pasi kishte mbajtur një numër pozicionesh komanduese, dhe ka marrë pjesë në operacione ushtarake jashtë vendit dhe në misione paqeruajtëse të OKB-së.
Që prej daljes në pension 16 vjet më parë, ai ka drejtuar firmën konsulente Mares Associates LLC, e cila, sipas biografisë së tij zyrtare, specializohet në bashkëpunimin ndërkombëtar të sigurisë, modernizimin e mbrojtjes dhe shërbimet këshillimore strategjike.
Ndërkohë, Eric P. Wendt i cili u konfirmua në fundjavë nga Seanti si Ambasador i ri në Shqipëri, është një oficer i lartë i ushtrisë amerikane në pension, me mbi 34 vite shërbim, pjesa më e madhe në forcat speciale “Green Beret”. Ai ka shërbyer gjithashtu si komandant i Komandës së Operacioneve Speciale të NATO-s, si dhe në pozicione të rëndësishme në Lindjen e Mesme dhe rajonin e Paqësorit.
Gjatë karrierës së tij, Wendt ka mbajtur detyra si koordinator sigurie i SHBA për Autoritetin Izraelito-Palestinez (2017–2019) dhe shef shtabi në Komandën e Paqësorit të SHBA. Ai është diplomuar në Universitetin e Kalifornisë, Santa Barbara dhe ka përfunduar studimet pasuniversitare në fushën e sigurisë kombëtare në Naval Postgraduate School. Ai flet disa gjuhë të huaja, përfshirë arabishten dhe koreanishten.
Eric P. Wendt ishte propozuar më herët edhe për postin e ambasadorit në Katar gjatë mandatit të parë të Donald Trump, por kandidatura e tij nuk u konfirmua nga Senati.
Ndryshe, Ambasada amerikane në Tiranë ka mbetur pa Ambasador prej rreth tre vitesh, që pas largimit të ambasadores Yuri Kim në vitin 2023. Gjatë kësaj periudhe, misioni është drejtuar nga të ngarkuar me punë dhe përfaqësues të përkohshëm.
