Nesër në Prishtinë, OVL-UÇK: Protestë gjithëpopullore
Organizata e Veteranëve të Luftës së Ushtrisë Çlirimtare të Kosovës, OVL-UÇK, ka paralajmëruar protestë gjithëpopullore në Prishtinë, një ditë pas zhvillimeve të fundit në procesin gjyqësor ndaj ish-drejtuesve të UÇK-së.
Protesta është paralajmëruar të mbahet të premten, më 18 shtator, nga ora 12:00, në Sheshin “Skënderbeu”.
Gazmend Syla nga OVL-UÇK tha se organizatat e dala nga lufta e konsiderojnë vendimin e fundit si të padrejtë dhe kundërshtuan, siç tha ai, përpjekjet për të vendosur në të njëjtën peshore luftën e UÇK-së dhe zhvillimet e viteve 1998-1999.
“UÇK-ja nuk është kurrë ndërmarrje kriminale, kjo ishte rezistenca në kuptimin tonë përballë dëbimit, masakrave dhe e vetmja përgjigje e një kombi që ishte dënuar me zhdukje. Asnjë vendim nuk mund ta njollosë luftën tonë çlirimtare apo të barazojë ata që luftuan për liri,” tha Syla duke saktësuar se organizatat e dala nga lufta do të kërkojnë koordinim më të gjerë institucional e shoqëror, përfshirë edhe përfaqësues nga jashtë Kosovës.
“Kësaj padrejtësie që iu bë drejtuesve të luftës së UÇK-së do t’i përgjigjemi me një iniciativë për krijimin e një këshilli koordinues kombëtar dhe të një platforme ku do të përfshihen edhe Shqipëria, por edhe shqiptarët e tjerë që jetojnë në viset e tjera, qoftë Mali i Zi, qoftë Lugina e Preshevës, por edhe nga mërgata jonë,” tha Syla ndërsa bëri të ditur se kjo platformë do të synojë edhe përfshirjen e institucioneve dhe subjekteve politike në veprimet që organizatat e dala nga lufta planifikojnë të ndërmarrin gjatë procesit të apelimit.
“Do të kërkojmë krijimin e një strategjie kundërshtuese ndaj këtij vendimi deri në përfundim të procesit të apelit, ku kërkojmë përfshirjen e institucioneve tona, partive parlamentare, shoqërisë civile, institucioneve të tjera të cilat do të mund të kontribuonin në këtë drejtim,” tha Syla ndërsa bëri publik edhe lajmin se sot në orën 16:30 OVL-UÇK dhe disa shoqata të familjeve të dëshmorëve dhe të invalidëve do ta prezantojnë platformën e tyre, ndërkohë paralajmëroi pjesëmarrjen e tyre edhe në aktivitetin e studentëve.
“Organizatat e dala nga lufta sot në takimin që mbajtëm pak më herët me këshillin drejtues morëm vendim që të thërrasim protestë gjithëpopullore nesër në ora 12:00 në Sheshin Skënderbeu,” tha Gazmend Syla duke sqaruar se protesta e së premtes është pjesë e një reagimi më të gjerë të organizatave të dala nga lufta ndaj zhvillimeve në proceset gjyqësore që lidhen me ish-pjesëtarët dhe drejtuesit e UÇK-së ndërsa përfundoi:
“Ju e dini, nuk është vendimi i padrejtë vetëm ky i djeshmi, bashkëluftëtarët tanë, ish-luftëtarët e Ushtrisë Çlirimtare të Kosovës janë bukur gjatë kohës nën goditjet me ish-luftëtarët e Ushtrisë Çlirimtare të Kosovës.”
