Bllokimi i pagave të magjistratëve, SPAK nis hetimet, Drejtoresha e Thesarit merret në pyetje

Prokuroria e Posaçme kundër Korrupsionit dhe Krimit të Organizuar, SPAK, nisi hetimet duke marrë në pyetje personat që dyshohet se kanë urdhëruar ose vendosur që pagat e gjyqtarëve të mos lëvrohen.

Marrja në pyetje ka nisur me shefen e Thesarit. Pas saj, hetuesit pritet të vijojnë me zyrtarë të tjerë të ministrisë së Financave, për të hedhur dritë mbi vendimmarrjen dhe procedurat e ndjekura për moslëvrimin e pagave.

Deri tani, në dosjen hetimore janë administruar vendimi i Gjykatës Kushtetuese, vendimet e KLP-së dhe KLGJ-së, shkresat e Prokurorisë së Përgjithshme për listëpagesat, listëpagesat e anuluara nga Ministria e Financave, si dhe gjurmët elektronike të sistemit të Thesarit.

Ky hetim ka filluar pas kallëzimit penal të depozituar nga gjyqtarët për mosekzekutimin e pagave. Në kallëzim kërkohet që organi i prokurorisë të zbardhë rrethanat që kanë çuar në mosdhënien e pagave dhe të identifikojë personin ose personat përgjegjës për vendimmarrjen, përcjelljen apo zbatimin e saj. Mes personave të kallëzuar është edhe ministri i Financave, Petrit Malaj.

Ndërkohë Predsidenti i Edi Ramës, Bajram Begaj, një ditë pas votimit në Parlament të Ligjit për pagat e magjistratëve, vetëm me votat e PS-së, ka dekretuar këtë Ligj.

Ligji për pagat e magjistratëve u miratua me 84 vota, ndërsa opozita kërkoi që votimi të shtyhej, pasi nuk ishin reflektuar disa ndryshime.

Në arsyetimin banal të Presidentit të Edi Ramës thuhet se dha pëlqimin për hyrjen në fuqi të ligjit menjëherë bazuar në kërkesën e Kuvendit, i cili argumentonte nevojën dhe urgjencën për hyrjen në fuqi menjëherë me faktin se shfuqizimi i dispozitave për pagat e magjistratëve nga vendimi i Gjykatës Kushtetuese kishte bllokuar dhënien e pagave për të gjithë gjyqtarët dhe prokurorët, që nga data 1 gusht 2026 e në vazhdim.