Siguria Kombëtare është shembur, Berisha n’Parlament: Ky është parlamenti i Ergys Agasit!

Ky është parlamenti i Ergys Agasit, Vlora Hyseni shkarkonte secilin prej jush me porosi të tij, tha nga foltorja e Parlamentit, Kryetari i Partisë Demokratike, Sali Berisha, duke konstatuar se Siguria Kombëtare është shembur totalisht, Agasi e merrte fuqinë nga Padrinoja Edi Rama.

“Kjo seancë do hyjë në histori si seanca më e turpshme e mbledhur ndonjëherë. Sot parlamenti mblidhet si parlamenti i Ergys Agasit, si parlamenti më i papërgjegjshëm në tërë historinë kombëtare të ndonjë vendi.
Sot, për çdo qytetar shqiptar, që i thotë vendit vend, sigurisë siguri, çështja e të gjitha çështjeve është shembja totale e sigurisë së vendit pasi kryetarja e shërbimit informativ rezulton një anëtare e poshtër e grupit të strukturuar kriminal Agasi.

Në këtë sallë kam deklaruar, kam paralajmëruar se Ergys Agasi është mafiozi më i rrezikshëm i Evropës.
Po, sepse ai kontrollonte si asnjë tjetër në Shqipëri dhe në Evropë, të gjitha kartelet e drogës, të gjithë internetin e territorit të vendit, të gjitha sekretet e këtij shteti dhe SHISH-in.
Ai kishte fuqi të pakufizuar dhe këtë fuqi e kishte nga Padrino i vendit.
Rasti i Vlora Hysenit është i treti rast në botë, është El Polo i Venezuelës që punoi me kartelet, është shefi i shërbimit të Guinesë Bisau, të cilën kartelet amerikano-latine e shndërruan në narkoshtetin e parë dhe të vetëm në Afrikë, dhe tani vjen Vlora Hyseni, ky personazh i përçudnuar, që pasi shkarkohet nga detyra në një vend demokratik, për motive të forta, po ato motive e sjellin atë këshilltare të Padrinos dhe më pas e sjellin në krye të SHISH.
Emërimi i saj, jashtë të gjitha kritereve, përbën aktin më të papërgjegjshëm ndaj sigurisë së vendit.
Emërimi i saj ishte në mënyrë absolute për një rol të dyfishtë.
E kam deklaruar në atë kohë, e deklaroj edhe sot, ajo ishte një shërbëtore e Vuçiçit dhe Edi Ramës.
Por kjo është njëra anë, ana më e zezë është se njeriu që kishte për detyrë sigurinë e vendit dhe qytetarëve të këtij vendi, bashkëpunonte me hanxharët e krimit, ishte një ushtare e hanxharëve të krimit.
Ishte ushtare e një organizate më të rrezikshme kriminale.
Ishte njeriu që lëshonte në duart e bandave çdo sekret të këtij shteti.
Ishte njeriu që me porosi të Ergys Agasit shkarkonte secilin prej jush. Po!
Ishte njeriu që u thërriste ju në zyrë.
Damian, e ke vetë parasysh ti. Nuk je i vetmi ti, janë shumë si ti. Se e shihja se po bëje sikur nuk po dëgjoje.
Ulsi, shko merr dosjen sa herë të del emri aty.
Por prapë, në këtë rast, tragjike është se është shembur piramida e sigurisë,” tha Sali Berisha, duke ju drejtuar Kryetarit të Parlamentit, Niko Peleshi, se i kishte thënë që kanë parashikuar se do të zëvendësojnë, tani të lexoj përgjimet.

“Së dyti, çdo njeri duhet ta dijë se shteti ka përfaqësimet, por përfaqësimin më sensitiv, është përfaqësimi i shërbimit.
Shërbimi i inteligjencës shqiptare, për hir të së vërtetës, nga viti 1992 gjer sot, ka pasur në partneritetin e vet bashkëpunime jashtëzakonisht të çmuara dhe të rëndësishme me partnerët tanë, operacione shumë të çmuara.
Dhe jo vetëm me shërbimet e partnerëve strategjike, por edhe të vendeve të tjera me kontribute substanciale.
A mund të imagjinoni ju se çfarë paraqitet sot shteti, kombi para të gjitha këtyre vendeve që kishin vendosur, kishin realizuar operacionet më të besueshme me këtë shërbim nga viti 1992-1993 gjer sot?
A e kuptoni ju se çfarë do të thotë për komunitetet inteligjente të vendeve partnere kjo?
Nuk ka rekord më të zi se ky.
Nuk ka rekord më të zi se ky!
Lubi Balluku ka vjedhur qindra milionë, ka prodhuar një ushtri Agasësh, por prapë ato janë dëme në euro, vjedhje, plaçkitje.
Sekreti i shtetit ka qenë në duart e Lubisë tjetër.
Shefi i shërbimit informativ di çdo sekret, dhe aq sa di kryeministri dhe presidenti, i di prej atij ose asaj.
Ajo, siç rezulton, e ka pajisur organizatën kriminale të Ergys Agasit me mjetet më të sofistikuara të regjimit.
Të gjithë jeni në dosje të filmuar. Ulsi, të ka dalë shumë herë emri.
Po nuk je vetëm ti. Nuk je jo, je me plot të tjerë.
Ku janë këta Agasët e Ballukut e të tjerë me radhë.

Pra, aty në zyrë që krijoi, të pajisur me të gjitha mjetet më të sofistikuara, të blera nga taksapaguesit shqiptarë ose dhuratë e partnerëve tanë për sigurinë kombëtare, për vëzhgimin e armiqve, janë përdorur për të gjitha qëllimet e ulëta të luftës brenda klaneve. Janë përdorur që të gjitha në funksion të Troplinëve, Çelëve dhe bandave të tjera,” tha Kryetari i Partisë Demokratike duke u shprehur qartë se nuk mund të ketë çështje tjëtër sot në parlament, ka rënë siguria kombëtare! Kërkoni ta mbuloni me histori rozë ose duke ia faturuar Vali Bizhgës, Edi Rama të japë urgjent dorëheqjen.

“Ju sot jeni më shumë se kurrë Ergys Agasë, Vlora Hysenë dhe Edi Ramë.
Këta jeni, me asgjë nuk mbroheni ju.
Ju tregoni se nuk keni asnjë interes kombëtar, shoqëror tjetër përveç interesave individuale tuajat.
Si mund të qëndroni ju para këtij akti të pashembullt në historinë e botës?
Çfarë përgjegjësie ndjeni ju ndaj kësaj apo kërkoni ta mbuloni me historinë rozë?
Apo kërkoni ta paraqisni Ramën viktimë të saj?
Apo kërkoni ta mbuloni me partneritetin e shërbimit me shërbime të tjera?
Po të gjitha këto janë historitë më të turpshme për një shtet që është narkoshtet.
A e patë ju apo jo?
Një vend i madh mik kishte planifikuar ta dekoronte me dekoratën më të lartë të veten. Dhe ju e paraqisni sot për avokati dhe jo si një dëshmi e një tradhtie të madhe që Edi Rama me ndihmësen e saj, e ka pasur kryesore.
U përpoq t’ia faturojë Vali Bizhgës. Jo mo zotëri, në asnjë ligj, në asnjë nen, shefi i kabinetit të kryeministrit nuk ka asnjë lidhje në mënyrë kategorike me shefin e shërbimit të vendit.
Shefi i shërbimit të vendit ka vetëm dy lidhje, presidentin dhe kryeministrit.
Por tani që kanë shpërthyer ujërat e zeza tuajat në të katër anët, tani ju… çfarë të përfundoj?
Nuk mund të ketë çështje tjetër përveç kësaj sot, ka rënë siguria kombëtare.
Pse je ti i papërgjegjshëm dhe do ta kapërcesh sikur nuk ka ndodhur gjë, kjo nuk mund të ndodhë.
Shqiptarët kërkojnë autopsinë e plotë, të vërtetën e të gjithë kësaj ngjarje të pashembullt.
Njeriu i paguar për sigurinë e tyre ka bashkëpunuar me kartelet dhe bandat më të rrezikshme të krimit, me autorësinë e Edi Ramës, e Padrinos.
Nuk është një ditë kjo si të tjerat, në 35 vite, asnjë ditë nuk ka pasur si kjo.
Fatos Klosi ka bashkëpunuar me bandat, i ka përdorur ato kundër kundërshtarëve politikë, kurse kjo ishte një ushtare e bandës, një ushtare e shpifur, e turpshme.
Dhe së fundi, thotë e kisha bashkëpunëtor.
Shteti i narkosve nuk shkoi më tutje.
Shiko sa e ulët, sa pa karakter.
Dhe një ditë përpara nxjerr Batonin, i cili u thotë shqiptarëve se ajo, prisni njëherë a ka pasur detyrë apo nuk ka pasur detyrë,” tha Kryetari i Partisë Demokratike, Sali Berisha, duke përfunduar:
“Çfarë jeni kështu mo? Si mund të jeni kaq antishqiptarë? Si mund të toleroni një gjë të tillë ju? Si mund të personifikoni veten tuaj me Vlora Hysenin dhe Ergys Agasin? Ju jeni skllevër të Padrinos. Po, po. Jeni skllevër të mëkateve tuaja.
Si mund të silleni në këtë mënyrë sikur nuk ka ndodhur asgjë.
Ndaj sot debati do të jetë vetëm për këtë çështje dhe kreu i juaj të njoftojë dorëheqjen aty ku është dhe të vijë me urgjencë këtu.”

Pas fjalës së liderit të opozitës, kishte ndër socialistë si trashëgimitari i kriminelëve të nomenklaturës së kryekriminelit Enver Hoxha, Blendi Klosi, që doli dhe mbrojti Drejtoren e shkarkuar tashmë të Shërbimit Informativ, Vlora Hyseni, ndonëse ajo akuzohet nga SPAK për zbulim të të dhënave sekrete dhe përkrahje të autorit të krimit, dhe GJKKO ka vendosur masën e sigurisë “arrest shtëpie” ndërsa është pezulluar detyra!

Pas kësaj mbrojtje ekzemplare nga një pjesëtar i familjes enveriste Klosi, deputetët e PD protestuan duke kërkuar diskutim lidhur me arrestimin e Drejtores së SHISH, por Kryetari i Parlamentit, Niko Peleshi, kundërshtoi propozimin dhe ndërpreu seancën.