Kosova kërkon mbështetjen e Gjermanisë për rrugën drejt BE-s
Për herë të parë, kryenegociatori Jeton Zulfaj ftohet në Komisionin për Çështjet e BE-së në Bundestag. Çfarë kërkon Kosova nga Berlini? CDU/CSU mbështet anëtarësimin, por kërkon reforma.
Në takimin e zhvilluar të mërkurën, më 23 shtator, në Bundestagun Gjerman, kryenegociatori i Kosovës me BE-në, Jeton Zulfaj. kërkoi mbështetjen e Gjermanisë për të çuar përpara aplikimin e Kosovës, i cili prej dhjetorit 2022 mbetet pa u shqyrtuar nga Komisioni Evropian.
Në një intervistë për DW, Zulfaj shpjegoi se Kosova pret që Gjermania të përdorë peshën e saj politike brenda BE-së për të ndihmuar në zhbllokimin e procesit. “Gjermania është shtet themelues i Bashkimit Europian dhe në një pozitë që të shtyjë përpara aplikimin tonë, duke na ndihmuar në mënyrë aktive e proaktive”, tha Zulfaj.
Çfarë kërkon Kosova nga Gjermania?
Vizita e Zulfajt në Berlin vjen në prag të paketës së zgjerimit të BE-së, e cila pritet të publikohet këtë vjeshtë. Kosova synon që gjatë diskutimeve të ardhshme në Këshillin e BE-së të merret vendimi për nisjen e shqyrtimit të aplikimit të saj. “Duam që Këshilli t’i kërkojë Komisionit që të procedojë aplikacionin tonë”, tha Zulfaj për DW.
Ky është një nga hapat e parë drejt marrjes së statusit të vendit kandidat. Komisioni Evropian duhet të vlerësojë nëse Kosova i përmbush kriteret e anëtarësimit dhe të paraqesë opinionin e tij. Vendimi për dhënien e statusit kandidat u takon shteteve anëtare të BE-së.
Zulfaj argumenton se Kosova ka bërë përparime në përmbushjen e standardeve evropiane. Sipas tij, në tregues si sundimi i ligjit, respektimi i të drejtave, zhvillimi ekonomik dhe liria e shprehjes, Kosova renditet ndër vendet e para të Ballkanit Perëndimor. “Tani detyra është e Bashkimit Europian. Janë 27 shtete të cilat duhet të pajtohen për ne që të ecim përpara dhe Gjermania sigurisht që ka peshën e saj të madhe”, tha Zulfaj.
CDU/CSU mbështet anëtarësimin, por kërkon reforma
Grupi parlamentar CDU/CSU në Bundestag mbështet anëtarësimin e Kosovës në BE, por kërkon nga qeveria në Prishtinë më shumë përkushtim ndaj reformave.
“Grupi parlamentar CDU/CSU do të vazhdojë ta mbështesë aspiratën e qytetarëve të Kosovës për t’u bërë pjesë e Bashkimit Evropian. Por për anëtarësimin në BE rëndësi kanë përparimi në reforma dhe përmbushja e kritereve të anëtarësimit. Tani i takon qeverisë së Kosovës të tregojë më shumë përkushtim ndaj reformave dhe të përmbushë kriteret e kërkuara”, deklaroi deputeti kristiandemokrat Tilman Kuban për DW. Ai shtoi se CDU/CSU do t’i shqyrtojë me kujdes raportet e progresit që priten në javët e ardhshme dhe do t’i bazojë vendimet e tij në rezultatet e tyre.
Kosova, e fundit në Ballkanin Perëndimor pa statusin kandidat
Kosova e dorëzoi aplikimin për anëtarësim në BE më 15 dhjetor 2022. Po atë ditë, Bashkimi Evropian i dha Bosnjës dhe Hercegovinës statusin e vendit kandidat. Në mars 2024, Këshilli Evropian vendosi edhe hapjen e negociatave të anëtarësimit me këtë vend. Gati katër vjet pas dorëzimit të aplikimit, Kosova mbetet i vetmi vend i Ballkanit Perëndimor pa statusin e vendit kandidat për anëtarësim në BE.
Një pengesë në rrugën e Kosovës drejt BE-së mbetet mosnjohja e pavarësisë së saj nga pesë shtete anëtare: Spanja, Greqia, Rumania, Sllovakia dhe Qiproja. Parlamenti Evropian u ka kërkuar këtyre vendeve ta njohin Kosovën, në mënyrë që ajo të mund të përparojë në procesin e anëtarësimit njësoj si vendet e tjera kandidate.
DW e pyeti qeverinë gjermane nëse do të angazhohej në Këshill për të mbështetur kërkesën e Kosovës. Deri në momentin e publikimit të artikullit, DW nuk ka marrë përgjigje./DW/
