Presidentja e KE sot në Tiranë, nesër në Prishtinë
Presidentja e Komisionit Evropian, KE, sot viziton Tiranën në kuadër të turit të saj në Ballkanin Perëndimor që është dhe ndalesa e parë e agjendës që Ursula von der Leyen do ta bëjë edhe në Kosovë, Mal të Zi dhe Maqedoninë e Veriut.
Gjatë qëndrimit në Tiranë, Von der Leyen pritet të zhvillojë takime me drejtuesit më të lartë të shtetit shqiptar, ku në qendër të diskutimeve do të jetë procesi i integrimit evropian dhe hapat e ardhshëm drejt anëtarësimit në Bashkimin Evropian.
Von der Leyen, sipas agjendës, do të jetë në zyrën e Ramës rreth orës 16:30, ku përreth 1 orë do bisedojë kokë më kokë me kryeministrin. Më pas rreth orës 17:30-18:00 do mbahet dhe konferenca për shtyp.
Më 1 tetor, presidentja e Komisionit Evropian do të udhëtojë drejt Prishtinës, ku do të takohet me ushtruesen e detyrës së Presidentes, Albulena Haxhiu, dhe kryeministrin Albin Kurti. Po atë ditë, agjenda e saj vijon në Podgoricë, ndërsa turi përmbyllet më 2 tetor në Shkup.
Në fokus të vizitës në katër vendet e Ballkanit Perëndimor pritet të jenë reformat dhe përparimi në rrugën evropiane, si dhe procesi i integrimit gradual të rajonit në strukturat dhe tregun e Bashkimit Evropian.
Një tjetër çështje me rëndësi do të jetë Plani i Rritjes për Ballkanin Perëndimor, instrumenti përmes të cilit BE synon të nxisë zhvillimin ekonomik, reformat dhe afrimin e vendeve të rajonit me tregun evropian.
Ky është turi i gjashtë i Presidentes së KE, Ursula von der Leyen, në Ballkanin Perëndimor. Gjatë vizitave, ajo pritet të ndalet edhe në projekte të mbështetura financiarisht nga Bashkimi Evropian.
