Zgjedhja e Presidentit, Kurti: Kemi filluar komunikimet për arritjen e një marrëveshje
Kryeministri i Kosovës, Albin Kurti, tha se kanë filluar komunikimet lidhur me marrëveshjen për zgjedhjen e Presidentit.
“Kemi filluar komunikimet dhe, natyrisht, kjo fundjavë është vendimtare për të pasur një marrëveshje, që javën e ardhshme të kemi presidentin,” tha sot Albin Kurti ndërsa kanë mbetur edhe katër ditë për partitë parlamentare që të arrijnë një marrëveshje për zgjedhjen e kreut të shtetit, ndryshe Kosova pritet të shkojë sërish në zgjedhje parlamentare.
Ndryshe, 6 tetori është afati i përcaktuar nga Gjykata Kushtetuese, përkatësisht 60 ditë për zgjedhjen e Presidentit të Kosovës, pas konstituimit të Parlamentit, ose vendi shkon në zgjedhje parlamentare të cilat duhet të mbahen më së largu më 15 nëntor.
Deri më tani, Lëvizja Vetëvendosje ka arritur një marrëveshje me LDK-në për Bekim Sejdiun si kandidat për President, marrëveshje e cila u kundërshtua nga klani i Isa Mustafës në këtë parti, por për liderin e LVV, Albin Kurti, Sejdiu vazhdon të jetë kandidat për President të Kosovës edhe pse ai ka paralajmëruar dorëheqje!
PDK që kishte refuzuar takimet para vendimit të Gjykatës Kushtetuese, tani thotë se është e gatshme të diskutojë për Presidentin, me kushtin që në Parlament të miratohet ndryshimi i Ligjit për Gjykatën Speciale.
Ndërsa Aleanca ishte partie e vetme e qartë që nga fillimi, takimet me Vetëvendosjen dhe zgjedhjen e Presidentin e saj i kushtëzoi me 6 kërkesa, dhe deri më sot nuk ishte pjesë e asnjë shfaqje politike që u luajt në kulisat e Parlamentit të Kosovës.
