Ky është buxheti më antipopullor dhe më antiqytetar i 36 viteve, jemi në mënyrë kategorike kundër tij, tha Kryetari i Partisë Demokratike, Sali Berisha, para Grupit Parlamentar të PD duke e cilësuar buxhet tipi të një narkoshteti, i përgatitur në fshehtësi dhe në kundërshtim me ligjin.
Me këtë rast, Kryetari i Partisë Demokratike u bëri thirrje bizneseve dhe qytetarëve nga e gjithë Shqipëria që t’i bashkohen protestës së 28 Nëntorit, duke e cilësuar këtë datë si një mundësi për një mobilizim të fuqishëm kundër Qeverisë Rama.
“Është një motiv i madh për qytetarët të derdhen në rrugët dhe sheshet e Shqipërisë me datën 28 Nëntor. Nuk ka nder më të madh për flamurin kombëtar të këtij vendi se sa një protestë e fuqishme e paparë ndonjëherë nga shqiptarët ndaj këtij regjimi, ndaj këtij Padrinoje. Duhet të nderojmë flamurin, duhet të nderohen me 28 Nëntor të rënët e kombit të të gjitha kohërave, sakrifica e tyre.
Ndaj dhe ftoj të gjitha bizneset nga mbarë vendi të shndërrojmë 28 Nëntorin në ditën e nderimit më të madh të flamurit tonë,” tha Kryetari i Partisë Dmokratike, Sali Berisha, para Grupit Parlamentar, duke përfunduar:
“28 Nëntori, dita e përkushtimit tonë ndaj flamurit, himnit të tij dhe të ardhmes të Shqipërisë.”
Fjala e plotë:
Ky buxhet paraqitet në Kuvend në mënyrën më tipike si buxhet i një narkoshteti.
Si buxheti i hartuar nga një organizatë kriminale në të cilën shtylla kryesore e të ardhurave bazohet në një paketë fiskale, paketë fiskale që shkel të gjitha ligjet bazë të këtij vendi, Kushtetutën e Shqipërisë dhe sigurinë juridike që ajo garanton për qytetarët shqiptarë, për bizneset dhe për çdo gjë tjetër në këtë vend.
Ky buxhet, në kundërshtim me përcaktimet e qarta ligjore, ka shkelur çdo lloj afati të parashikuar për konsultime publike.
Është përgatitur në fshehtësinë më të madhe sikur të ishte dokumenti më sekret i shtetit, jo dokumenti me implikacione direkte, implikacione të mëdha në xhepat e të gjithë qytetarëve shqiptarë.
Me implikacione të mëdha në të gjitha kontratat ekzistuese sot në këtë vend.
Në të gjitha plan bizneset, parashikimet.
Pra, paketë që de facto përmbys situatën edhe aktualisht shumë të disfavorshme.
Me shumë të drejtë dhomat e tregtisë, Dhoma Amerikane, Dhoma Gjermane dhe të gjithë shoqatat përfaqësuese të interesave të bizneseve kanë protestuar, kanë hedhur poshtë këtë paketë, në të cilën Padrinoja i vë para faktit të kryer.
Asnjë konsultim siç parashikon ligji. Detyrim ligjor.
Pra injorim total i qytetarëve, injorim total i biznesmenëve dhe vendosje e një pakete nga e cila përfiton një grusht njerëzish dhe ndëshkohen në një mënyrë apo në një tjetër qytetarët shqiptarë dhe bizneset shqiptare.
Dhomat e tregtisë, organizatat përfaqësuese të bizneseve kërkojnë anulimin e menjëhershëm.
Kërkojnë mosaplikimin e tij, pasi thashë një vendim i tillë, një paketë e tillë, bën të pasigurt çdo kontratë, çdo parashikim, çdo marrëveshje, çdo detyrim.
Nuk mund të ketë veprim më zuzar, një qeveri nuk mund të bëjë një veprim më zuzar se ky.
Dhe pse e gjitha kjo? Vetëm një arsye, nga frika se bizneset do të derdhen në rrugë së bashku me protestuesit.
Se çfarë arsye tjetër mund të ketë apo jo?
Si mund të bëhet kjo pas shpine?
Kjo paketë ndëshkon biznesin e ndershëm.
Në një anë shpall paqen fiskale me ata, të cilët kanë fshehur vite e stërvite veprimtarinë e tyre, kurse bizneseve të ndershme iu bie me satër.
Vetëm turizmi e ka shkallën e informalitetit në shtretër 78%.
Imagjinoni o zotërinj, Mali i Zi me 2 milionë turistë, ka trefishin, katërfishin e netëve të fjetjeve me Shqipërinë që ka 10-11 milionë turistë.
Imagjinoni se çfarë ndodh këtu.
Dhe këta në vend që të merren me formalizimin e ekonomisë, këta godasin biznesin e ndershëm.
Urdhëroni pra.
Kroacia me 15 milionë turistë ka 108 milionë net fjetje.
Mali i Zi me 2 milionë turistë ka 11 milionë net fjetje.
Shqipëria me 10 milionë turistë ka 6 milionë net fjetje. Nuk i takon as gjysëm nate turistit në Shqipëri.
Imagjinoni ju, shteti më qesharak i botës, ky është.
Dhe tani ky me këtë u jep goditje.
Ua rrit edhe këtyre TVSH-në, ua bën më të shtrenjtën në rajon, t’i zhysë edhe më shumë në informalitet.
Gjithçka bazohet në parime të kundërta me ato që duhet të udhëhiqet praktika dhe qëndrimi zyrtar ndaj biznesit.
Taksën e karburantit e çon tek makina, por jo në funksion të kilometrave.
Pra, si një makinë që bën gjithsej në vit 3 mijë kilometra, ashtu edhe një makinë që bën gjithsej në vit 200 mijë kilometra, sipas Padrinos, ndotin njëlloj dhe duhet të përgjigjen njëlloj për mjedisin.
Ka kjo ku të rrijë? Ka mendje njerëzore?
Dhe u garantoj që do jetë zero efekti në pompë.
Ka dyfishuar taksën e dividentit.
Çfarë do të thotë kjo? Thirrje publike për bizneset që të largohen nga Shqipëria.
Vende të tëra nuk kanë fare taksë për dividentin. Vendet përreth e kanë shumë më të ulët.
Nga tetë, zgjohet Sadami, në mëngjes dhe thotë do ua bëj 15.
Kjo është thirrje për t’u larguar nga Shqipëria.
Pra, paketa fiskale është një colpo di grazia që u jepet bizneseve në Shqipëri.
Që u jepet investimeve të huaja.
Po pse do vijë investitori i huaj në Shqipëri?
Çfarë do u rekomandojë Dhoma Amerikane e Biznesit, Dhoma Gjermane e Biznesit, organizata të tjera, çfarë do u thonë biznesmenëve të huaj, pse do vini në Shqipëri ju që nuk keni pikën e sigurisë?
Se i teket atij dhe bën paketa fiskale.
Më keq akoma, gjoja po u qan hallin shtresës në nevojë, shtresës më të varfër dhe po ul TVSH-në nga 20 në 6 përqind.
Kjo është identike me atë që po bën me taksën e qarkullimit.
Po pse, çfarë ka bërë?
Ka futur në TVSH 17.500 subjekte, të cilat janë në tërësi subjekte pa TVSH dhe që janë në tërësi dyqanet e shitjes së ushqimeve, të mallrave bazë, të cilat automatikisht do të rrisin çmimet.
A ka mendje më të mbrapshtë se kjo?
Në një anë thotë po i ulim, po mirë, në anën tjetër këto po i fusim në TVSH.
Janë futur të gjitha dyqanet që shesin ushqime bazë, produktet bazë dhe po kaq keq, dhe po kaq e dëmshme për qytetarin është se këtu futen profesionet e lira.
Futja e profesioneve të lira do të thotë dyfishim i çmimit të shërbimeve ose falimentim dhe largim nga Shqipëria.
Pra, paketa që gjoja e bëri për t’u qarë hallin qytetarëve në nevojë, në fakt ndëshkon më shumë se të gjithë të tjerët qytetarët në nevojë.
Do të shkojë te dentisti, do paguajë më shumë se ia ka rritur tatim fitimin në 23 përqind.
Do të shkojë tek avokati, do i presë tarifën.
Kudo që të shkojë qytetari, do gjejë një çmim më të lartë.
Ndaj dhe të gjitha dhomat e tregtisë, të gjitha organizatat përfaqësuesve në unison janë ngritur kundër kësaj pakete të pashembullt.
Me efekte rrënuese në ekonominë shqiptare.
Ju jeni të informuar se investimet e huaja në Shqipëri janë në rënie dramatike.
Kë quajnë investim të huaj këta?
Investim të huaj quajnë fitimet e kompanive të huaj në Shqipëri që investohen në Shqipëri.
Ky nuk është kapital që vjen nga jashtë, ky është kapital shqiptar. Ky krijohet në Shqipëri, investohet në Shqipëri.
800 milionë janë këto.
Tjetër, rrofshin çunat që blejnë apartamentet me 4 mijë euro metri katror.
Zëri më i fuqishëm i investimeve të huaja është real estate.
Sigurisht industria kokëposhtë, në rënie katastrofale.
Çfarë investimesh të huaja?
E dhëna e fundit, 80 përqind e ekonomisë e përqendruar në Tiranë. Jo në fabrika. Tirana nuk ka as gishtërinjtë e dorës fabrika. Ka kullat, monumente të drogës dhe korrupsionit.
Pra, rrofshin kullat me çmime stratosferike.
Pra, është një paketë e cila në fakt i jep një goditje shumë të rëndë biznesit.
I jep një goditje të rëndë biznesit të vogël.
I jep një goditje të rëndë profesioneve të lira. Shtresës së mesme apo klasës së mesme që është plazma e një shoqërie dhe të gjitha shkojnë në favor të klientelës së tij.
Po do ti të ulësh naftën, mor zotëri si ka mundësi që nafta në Shqipëri me katër porte shitet 40 përqind më shtrenjtë se sa në Kosovë dhe Maqedoni?
Shitet se ke taksën.
Barazo taksën me këto vende dhe vendos rregullin, asnjë litër naftë nuk mund të shitet më shtrenjtë se në Kosovë dhe Maqedoni.
Dhe ky këtu fiton edhe transportin se ata detyrohen ta transportojnë nga porti i Durrësit apo ai i Selanikut, naftën që shesin.
Kurse ti e merr nga portet e tua.
Pra, tani thotë po e heq unë këtë, në pompë do të shitet po aq, por njerëzit nuk do përdorin dot makinat. Taksat, tre-katër herë më të larta se në Kosovë.
Pra, kemi të bëjmë me një buxhet do të thosha ky është buxheti më antipopullor, më antiqytetar i 36 viteve.
Shqipëria nuk ka paraqitur kurrë një buxhet të tillë.
Një buxhet që shkel parimet kushtetuese të vendit, shkel ligjet bazë të biznesit, të tregtisë.
Shkel qindra mijëra kontrata ekzistuese, marrëveshje, parashikime, plane, projekte.
Unë përgëzoj të gjithë deputetët të cilët në mënyrë intensive e kanë kundërshtuar këtë buxhet, këtë paketë fiskale dhe sigurisht që qëndrimi ynë do i jetë i prerë, kategorik kundër tij, duke e konsideruar këtë si buxhetin më të paligjshëm, se është i paligjshëm, është antikushtetues.
Nuk mundet ti t’u dalësh në shteg, në pritë bizneseve se ka parashikim, ka siguri, veprimtarinë e tij e ka bazuar në atë që thotë Kushtetuta, në sigurinë juridike.
Dhe ti i del papritmas dhe i thua, do e kesh 15 përqind dividentin, do e kesh 21 përqind TVSH-në, do të futesh në TVSH, etj, etj me radhë.
Është një motiv i madh për qytetarët të derdhen në rrugët dhe sheshet e Shqipërisë me datën 28 Nëntor.
Nuk ka nder më të madh për flamurin kombëtar të këtij vendi se sa një protestë e fuqishme e paparë ndonjëherë nga shqiptarët ndaj këtij regjimi, ndaj këtij Padrinoje.
Duhet të nderojmë flamurin, duhet të nderohen me 28 Nëntor të rënët e kombit të të gjitha kohërave, sakrifica e tyre.
Ndaj dhe ftoj të gjitha bizneset nga mbarë vendi të shndërrojmë 28 Nëntorin në ditën e nderimit më të madh të flamurit tonë.
Me një regjim si ky, pasiguria totale i pret shqiptarët.
Urdhëro ç’bën. Kur ky me aktet që janë, si të thuash, të sanksionuara në të gjitha ligjet, procedura e tij vepron në këtë mënyrë, imagjinoni.
Por ka dhe një motiv të madh, përveç kësaj, barbaria që ai tregoi ndaj studentëve nuk i falet kurrë.
Ato këmbë të thyera, ato krahë, ato kafka të çara, janë plagë për çdo shqiptar, sepse ato kanë qenë akte barbare, të një njeriu për karrigen e tij që ka pasur motiv vetëm urrejtjen ndaj rinisë shqiptare, ndaj të ardhmes së këtij vendi.
Edhe ky është një motiv madhor.
28 Nëntori, dita e përkushtimit tonë ndaj flamurit, himnit të tij dhe të ardhmes të Shqipërisë.