Kandidati i Listës Studentore, Aleksandar Çupiç, u zgjodh kryetar i Parlamentit të Serbisë me 140 vota. Kundërkandidati i tij, Stojan Radenoviç, nga grupi parlamentar opozitar “Serbia fiton”, mori 97 vota.
Votimi u zhvillua në ditën e tretë të seancës konstituive ku deputetët votuan hapur, një nga një, pasi iu thirr emri.
Pas votimit, Çupiç mori drejtimin e seancës.
“Më është besuar një nder dhe një përgjegjësi e madhe. Dialogu dhe toleranca duhet të bëhen pjesë e kulturës politike të secilit prej nesh,” tha Çupiq në fjalën e tij pas zgjedhjes si Kryetar i Parlamentit më pas shpalli një pushim dyorësh.
Seanca do të rifillojë në orën 15:40.
Pas pushimit, Parlamenti pritet të zgjedhë Nënkryetarin, anëtarët e organeve parlamentare të punës dhe anëtarët e delegacioneve të përhershme parlamentare pranë institucioneve ndërkombëtare. Kuvendi pritet të emërojë edhe sekretarin e përgjithshëm.
Me zgjedhjen në krye të Parlamentit, Çupiç merr edhe detyrën e ushtruesit të detyrës së Presidentit të Serbisë, pasi Aleksandar Vuçiç dha dorëheqje më 27 shtator, para zgjedhjeve të parakohshme parlamentare të 25 tetorit.
Kush është Aleksandar Çupiç?
Aleksandar Çupiç është profesor asistent në Departamentin e Transportit Postar dhe të Rrjeteve në Fakultetin e Transportit të Universitetit të Beogradit.
Sipas biografisë së publikuar në faqen e studentëve, Çupiç ka lindur më 1978 dhe është rritur në Prokuple. Ai ka përfunduar studimet, magjistraturën dhe doktoraturën në fakultetin ku punon sot.
Ai është i specializuar në funksionimin, automatizimin dhe digjitalizimin e transportit postar. Ai është autor dhe bashkautor i disa punimeve shkencore mbi optimizimin e sistemeve postare, automatizimin dhe zbatimin e metodave të vendimmarrjes sipas disa kritereve. Puna e tij kërkimore përfshin edhe zbatimin e metodave të avancuara në transportin postar dhe në logjistikë.
Çupiç ka nënshkruar nismën “Mbështetja universitare” dhe ka mbështetur protestat studentore. Në serën e tij në Sopot strehoi studentët që po marshonin drejt Kragujevcit. Më pas, edhe vetë iu bashkua marshimeve.
Aleksandar Çupiq është baba i gjashtë fëmijëve. Bashkë me bashkëshorten drejton një fermë familjare në Sopot, ku që nga viti 2017 merren me prodhimin organik të frutave dhe perimeve./RFE/