Në Shqipëri shqetësimet për korrupsionin janë rritur se tepërmi gjatë këtij viti, teksa në vendet e Ballkanit Perëndimor po shënojnë rënie.
Sipas anketës “SecuriMeter 2026” të Këshillit të Bashkëpunimit Rajonal në Shqipëri, RCC, 92.1 për qind e të anketuarve e konsiderojnë korrupsionin mjaft ose shumë të përhapur, nga 86.6 për qind një vit më parë. Mesatarja e gjashtë vendeve të rajonit ra nga 81 për qind në vitin 2025 në 76.5 për qind në vitin 2026, duke e zgjeruar diferencën me Shqipërinë me rajonin në 15.6 pikë përqindjeje.
Në vitin 2026, 36 për qind e të pyeturve në Shqipëri e cilësuan korrupsionin “shumë të përhapur”, nga 28 për qind në vitin 2025. Ndërkohë, përqindja e atyre që e quajnë “mjaft të përhapur” ra lehtë, nga 58 për qind në 56 për qind.
U ngushtua edhe grupi që e sheh korrupsionin si dukuri të rrallë. Në vitin 2025, rreth 13 për qind e të anketuarve në Shqipëri e konsideronin mjaft ose shumë të rrallë. Në anketën e fundit, kjo përqindje zbriti në 6.7 për qind. Në rajon, 16.8 për qind e të anketuarve e cilësuan korrupsionin mjaft ose shumë të rrallë, rreth dy herë e gjysmë më shumë se në Shqipëri.

Në vitin 2023, 86.8 për qind e të anketuarve në Shqipëri e konsideronin korrupsionin mjaft ose shumë të përhapur, vetëm 1,4 pikë përqindjeje mbi mesataren rajonale. Një vit më pas, treguesi në Shqipëri u ngjit në 91.2 për qind, për të zbritur në 86.6 për qind në 2025. Rritja e fundit e çoi në nivelin më të lartë të periudhës 2023–2026.
Në të njëjtën periudhë, mesatarja rajonale ka rënë çdo vit, nga 85.4 për qind në vitin 2023 në 82.8 për qind në vitin 2024, dhe 76.5 për qind në 2026. Edhe te përgjigjja “shumë i përhapur”, diferenca mes Shqipërisë dhe rajonit është ngushtuar ndjeshëm. Në vitin 2025, këtë përgjigje e dhanë 28 për qind në Shqipëri dhe 40 për qind në rajon.
Sipas “SecuriMeter 2026”, 61 për qind e të anketuarve në Shqipëri thanë se ata ose një anëtar i familjes kishin bërë një pagesë shtesë, kishin dhënë një dhuratë me vlerë ose kishin bërë një donacion në sistemin shëndetësor gjatë tre viteve të fundit, kundrejt 27.4 për qind në rajon. Po ashtu, 63 për qind e të pyeturve në Shqipëri mendojnë se institucionet publike nuk i trajtojnë qytetarët në mënyrë të barabartë, kundrejt 51.6 për qind në rajon.
Rreziku i favorizimit lidhet edhe me mënyrën si jepen kontratat publike dhe si zgjidhen çështjet e pronësisë. Sipas Komisionit Europian, gati një në katër tenderë në Shqipëri në vitin 2025 u dha me një ofertues të vetëm, çka kufizon mundësinë për të krahasuar çmimet dhe kushtet. Në Kadastër, pasiguria mbi titujt e pronësisë dhe vonesat në legalizime i lënë qytetarët dhe bizneset në pritje të vendimeve administrative, duke krijuar hapësirë për ndërmjetësim informal dhe trajtim preferencial./Monitor/