Ministrisë së Mbrojtjes i është dhuruar roboti tokësor pa ekuipazh, UGV, i prodhuar nga kompania kosovare-amerikane STRIDAR, për nevojat e Forcës së Sigurisë së Kosovës, FSK. Lajmin e ka bërë të ditur ministri i Mbrojtjes, Ejup Maqedonci, duke theksuar se ky është roboti i parë i këtij lloji i prodhuar në Kosovë.
“UGV-të janë mjete robotike pa operator. Ato mund të kontrollohen nga distanca ose të kryejnë detyra të caktuara në mënyrë autonome. Varësisht nga modeli dhe konfigurimi, mund të përdoren për vëzhgim, transport pajisjesh dhe mbështetje në zona me rrezik; mund të pajisen edhe me sisteme armatimi të kontrolluara nga distanca,” shkprehet Ejup Maqedonci përmes një postimi në rrjetin social Facebook duke theksuar se marrëveshjen për donacionin e ka nënshkruar së bashku me përfaqësuesin e kompanisë STRIDAR, Nils Alstad.
Ministri i Mbrojtjes, Ejup Maqedonci, ka falënderuar kompaninë për kontributin dhe angazhimin në zhvillimin e kapaciteteve vendore, duke vlerësuar se teknologjitë e tilla mund të përdoren si për nevojat e mbrojtjes, ashtu edhe për ato civile.
Ndryshe, roboti tokësor pa ekuipazh, UGV, i prodhuar nga kompania kosovare-amerikane STRIDAR, mbanë numrin serik SR-4-001-KS.