Me 28 Nëntor të gjithë në Tiranë, Berisha: PD e hapur për të gjithë që e konsiderojnë Ramën të keqen më të madhe
“Partia Demokratike është e hapur ndaj të gjitha forcave të tjera politike që e konsiderojnë Edi Ramën të keqen më të madhe për kandidatë të përbashkët, për zona të veçanta, për çfarëdo propozimi të arsyeshëm që të mund të krijojmë një front të përbashkët,” tha sot Kryetari i PD, Sali Berisha, duke e bërë të qartë se deri më tani nuk janë zhvilluar negociata të mirëfillta, por në javën që vjen do bëhen përpjekje serioze, të plota në këtë drejtim.
“PD ka paraqitur dhe do paraqesë projektin e vet për mbështetjen e qytetarëve. Natyrisht asgjë prej propozimeve tona nuk pranohet, por janë shqiptarët që e kanë në dorën e tyre të largojnë sa më shpejt këtë narkoshtet dhe narkoqeveri grabitqare në mënyrë që pasuritë publike t’i shndërrojmë më të mira dhe mirëqenie për qytetarët shqiptarë,” tha Sali Berisha gjatë bashkëbisedimit me qytetarët përmes rrjeteve sociale duke e konsideruar bashkimin e opozitës si jetik dhe vendimtar ndërsa ftoj të gjithë shqiptarët me 28 Nëntor, të gjithë në Tiranë, të ngrihemi në lartësinë e flamurit
“Unë i siguroj shqiptarët se Partia Demokratike nuk do të ndërpresë kurrë përpjekjen dhe betejën e saj kundër narkodiktaturës së Edi Ramës.
Por sot është më e domosdoshme se kurrë të bashkohemi, siç jemi bashkuar në momente kritike të kombit.
Por për hir të së vërtetës, pa shkuar larg, siç u bashkuam dhe në muajin qershor të këtij viti, ku bulevardi i Tiranës, sheshet dhe rrugët e Tiranës u mbushën me qytetarë të të gjitha bindjeve politike kundër të keqes më të madhe që ishte Edi Rama.
Të dashur miq, kishte prej tyre vërtet specialistë, ekspertë, po dhe qytetarë me një ndërgjegje të lartë mjedisore.
Kishte të tjerë që nuk mund të pranonin kurrë shkeljen e parimeve të pronësisë, por në tërësi ai uragan u ngrit kundër diktaturës, vjedhjeve të tmerrshme të Edi Ramës dhe organizatës së tij kriminale qeverisë.
Ai bashkim i madh duhet të jetë frymëzim për çdo shqiptar të bashkohemi në mënyrë që të votojmë të lirë.
Cilido që konsideron votën e lirë si zemrën e demokracisë dhe të lirisë duhet të bashkohemi.
Zgjedhje në diktaturë nuk ka. Zgjedhjet në diktaturë i bën partia shtet dhe ato janë farsë,” tha Kryetari i Partisë Demokratike, Sali Berisha duke përfunduar me thirrjen për të gjithë shqiptarë me 28 Nëntor në Tiranë:
“Unë ftoj të gjithë shqiptarët me 28 Nëntor, të gjithë në Tiranë, të ngrihemi në lartësinë e flamurit, të nderojmë më shumë se kurrë sepse ka nevojë më të madhe flamuri që sheh kombin e tij të tretet, të largohet, të braktisë vendin.
Le t’i tregojmë ne me 28 se s’pajtohemi kurrë, se do t’i japim përgjigjen më të merituar armikut të egër ekzistencial të shqiptarëve Edi Ramës dhe regjimit të tij.”
Fjala e plotë:
Java ishte një javë tejet e zymtë, javë në të cilën kriza u thellua edhe më shumë.
Javë në të cilën buxheti i narkoqeverisë u provua në parlament si buxheti i vjedhjes më të madhe në historinë e të gjitha buxheteve të vendit.
10 miliardë euro taksa, mund, djersë dhe përpjekje tuaja, jo vetëm nuk u rikthehen ju, por përkundrazi vidhen dhe shpërdorohen në mënyrën më të papërmbajtur.
Ndërkohë muajin e kaluar, çmimet e ushqimeve në Shqipëri u rritën pesë herë më shumë se në hapësirën e BE.
Ndërkohë, Eurostat informon se të ardhurat e disponueshme për familjet shqiptare janë më të paketat në rajon.
Informon se mbi 30 përqind e shqiptarëve kanë probleme me kafshatën e gojës.
Edi Rama ka përcaktuar në këtë buxhet 930 milionë para xhepi për administratën e tij, për telefona, zyra, vetura, lukse, ahengje, darka dhe dreka.
Me 930 milionë euro, të dashur qytetarë dhe qytetare, mund të rriteshin me 60 përqind rrogat e ulëta, me 40 përqind rrogat e mesme, mund të vendosej minimumi jetik për shqiptarët dhe natyrisht mund të dyfishohej jo rritja e pensioneve, siç thotë Edi Rama, por indeksimi i tyre në përputhje me rritjen e çmimeve.
Duke i dhënë me minimumin jetik dhe një përgjigje përfundimtare pensionit minimal, pensioneve jo të plota, etj.
Pra, ata të cilët po varfërojnë dhe vjedhin shqiptarët në mënyrën më të papërmbajtur, u zotuan se me buxhetin e ri do të dyfishojnë apo shumëfishojnë vjedhjet e tyre ndaj shqiptarëve.
PD ka paraqitur dhe do paraqesë projektin e vet për mbështetjen e qytetarëve.
Natyrisht asgjë prej propozimeve tona nuk pranohet, por janë shqiptarët që e kanë në dorën e tyre të largojnë sa më shpejt këtë narkoshtet dhe narkoqeveri grabitqare në mënyrë që pasuritë publike t’i shndërrojmë më të mira dhe mirëqenie për qytetarët shqiptarë.