Konflikti mes Presidentit dhe partisë në pushtet në Poloni vazhdon. Kodi zgjedhor, me të cilin partia në pushtet në Poloni mendon të hyjë vitin e ardhshëm në zgjedhjet evropiane, pritet të mënjanojë partitë e vogla.

Vetëm dy nga gjashtë partitë të përfaqësuara në parlamentin e Polonisë do të kishin një shans për të marrë ndonjë mandat, me këtë bazë juridike për zgjedhjet. Por me veton e Presidentit Andrzej Duda ky plan për zgjedhjet e ardhshme evropiane me sa duket nuk është më në tryezë.

Por në Poloni në vjeshtën e vitit 2019 zhvillohen edhe zgjedhjet parlamentare, dhe me sa duket PiS do që ta përshtatë bazën juridike edhe për këto zgjedhje sipas shijes së saj. Mbetet të shpresohet që Duda do të pozicionohet edhe atëherë kundër partisë, prej së cilës vjen.

Megjithatë sjellja e deritashme e tij të jep pak shpresa. Vërtet që ai e ngadalësoi me veton e tij reformën e drejtësisë, por në thelbin e saj ai nuk ndryshoi asgjë, por e miratoi ndërhyrjen politike të qeverisë te drejtësia. Vendimtare për mënyrën si do të veprojë ai nuk mendohet se do të jenë parimet, por rrethana që si i vlerëson Duda shanset e tij për zgjedhjet presidenciale të 2020-ës: pa PiS ai nuk ka asnjë shans,  por vetëm mbështetësit e kësaj partie nuk do të ishin të mjaftueshëm për të që t’i fitonte zgjedhjet