Përgjigje Palokës/ Endri Fuga: Ka 100 arsye për të bërë opozitë me Edi Ramën e me qeverinë e tij, por …
Arrogant më i madh se shefi, mundohet ti kthej përgjigje Nënkryetarit të Partisë Demokratike, Edi Paloka dhe e pranon se ka njëqind arsye për të bërë opozitë me Edi Ramën e me qeverinë e tij, por jo të merresh me helikopterë dhe luksin. Është ky Drejtori i Komunikimit të Kryeministrit, Endri Fuga i cili duke pranuar se kryeministri Edi Rama ka udhëtuar sot drejt Torinos me charter, thotë se ai ishte prenotuar nga klubi i Lazios për drejtorin sportiv, Igli Tare. Udhëtimin me taren e quan punë, e për këdo që nuk e di, thotë ai udhëtimet e kryeministrit me helikopter gjatë kohës së tij në detyrë, numërohen më pak se sa gishtat e duarve.
“Është plotësisht e vërtetë që kryeministri Edi Rama ka udhëtuar sot drejt Torinos, së bashku me Drejtorin Sportiv te Lazios, Igli Tare. Ata janë nisur nga Rinasi me një avion të prenotuar nga klubi i Lazios për drejtorin sportiv, Igli Tare. I cili pasi ka kaluar disa ditë pushime në jug të Shqipërisë, është kthyer sot në detyrën e tij,” tha Endri Fuga për “Panorama” duke sqaruar se Kryeministri ështëi ftuar nga presidenti Agnelli, për ndeshjen e parë në shtëpinë e juventinëve dhe do të kthehet nesër në mëngjes.
“Për ata që përpiqen të luajnë luftash me avionë e me helikopterë, sqarojmë se udhëtimet e kryeministrit të vendit i kanë kushtuar shumë më pak buxhetit të shtetit, sesa ato të paraardhesit,” thekson Fuga duke harruar që nëse krahasojmë me punën e paraardhësit Edi Rama duhet të paguaj lekë që futet në Kryeministri e lëre më të shetitet edhe me avionë.
Kryeministri udhëton në Economy Class dhe po kështu edhe ministrat, tha Endri Fuga duke shtuar se buxheti i shtetit nuk ka paguar asnjëherë për asnjë udhëtim privat apo familjar të tij.
“Për këdo që nuk e di se kryeministrat si rregull i kanë shfrytëzuar helikopterët gjatë orëve të detyruara vjetore të fluturimit që këto mjete kryejnë (për arsye teknike mirëmbajtjeje), informojmë se udhëtimet e kryeministrit me helikopter gjatë kohës së tij në detyrë, numërohen më pak se sa gishtat e duarve,” thekson Drejtori i Komunikimit të Kryeministrit Rama, Endri Fuga duke dëshmuar edhe deficcencën që ka kryeministri me komunikimin kur ai drejtohet nga një person që takimin me një mik e quan punë, dhe kohën e kaluar në një ndeshje futbolli, “kohë në detyrë”.
Në fund, ish-strategu I Mjaft-it e pranon se ka njëqind arsye për të bërë opozitë me Edi Ramën e me qeverinë e tij, por ai nuk ka lidhje me luksin:
“Ka me siguri njëqind rrugë e arsye për të bërë opozitë me Edi Ramën e me qeverinë e tij! Por nëse do më kërkonin të zgjidhja një absurditet mes plot të tillëve në listen e akuzave ndaj kryeministrit, është akuza se Edi Rama është i dhënë pas luksit, veseve e parave. Një budallallëk me brirë!”
