Policia kërkon kanabis në Majën e Thanës…
Mëngjesi i policëve në Dibër filloi duke kërkuar kanabis në Majën e Thanës.
“2 orë rrugë në këmbë dhe aktualisht ndodhemi afro 600 metra mbi nivelin e detit, në malin e quajtur “Maja e Thanës”. Jemi një nga grupet Drejtorisë Vendore të Policisë Dibër, që kontrollojmë territorin në kuadër të parandalimit dhe goditjes së kultivimit të bimëve narkotike,” thekson Policia e shtetit përmes një postimi në rrjetin social Facebook duke shtuar se këtë vit në këtë qark nuk është evidentuar asnjë rast i kultivimit të bimëve narkotike.
Policisë nga Maja e Thanës që mburret me këtë statistikë po i kujtojmë akuzën e Ish-zëvendësdrejtorit të Policisë së Korçës, Arben Hyseni, fundvitin e kaluar për drejtues të lartë të policisë për kultivim dhe shitje të lëndëve narkotike në zonën e Dibrës. Në një postim në rrjetin e tij social, Hyseni postoi edhe foto nga tuneli i Vakufit ku duket qartë gjurmët e lëndës narkotike.
“Bashkëfshatarët e mi, po ju sjell një foto bërë në njërin nga 4 tunelet e Vakufit para pak ditësh. Ajo çfarë shihet janë gjurmët e krimit që kanë ngelur nga përpunimi i hashashit nga çunat e Sajmir Tahirit dhe brigadieri i policisë Diber tepelenasi, E.Targaj (ky i fundit vazhdon të jetë në këtë detyrë edhe pse e mbushi gjithë Dibrën me hashash e solli ne Diber “agronomë” nga Tepelena e Lazarati që të shërbenin hashishit) .
Ju nuk mund ta merrni me mend se çfarë inpakti negativ ka sjellë mbjellja e hashashit në fshatin tonë, që nuk ishte mbjell kurrë më parë. Me thonë se 80% e të rinjve në fshat janë bërë përdorues të hashashit, në një rast nje djalë ka përfunduar ne psiqiatri e vazhdon të jetë i sëmur psiqik nga përdorimi i hashashit, kemi djem të tjerë që i kanë futur në burgje kot, e çuditërisht ato që e mbollën e morën lekët për ccdo rrënje hashashi të mbjellë, vazhdojnë të jenë brigadierë policie, Dr. Policie në Dr Policisë Dibër”, shkruante Hyseni në denoncimin e tij, i cili nuk mori përgjigje nga kjo polici e gatshme që ecë dy orë rrugë në këmbë, 600 metra mbi nevelin e detit.
Gjithsesi, për 4 tunelet e Vakufit policia e Xhafajt nuk flet ama çfarë po ndodhë në Majën e Thanës mund të shikoni. Ja “dëshmia”:
Ja postimi i plotë:
Mirmëngjes nga Policia e Shtetit!
2 orë rrugë në këmbë dhe aktualisht ndodhemi afro 600 metra mbi nivelin e detit, në malin e quajtur “Maja e Thanës”. Jemi një nga grupet Drejtorisë Vendore të Policisë Dibër, që kontrollojmë territorin në kuadër të parandalimit dhe goditjes së kultivimit të bimëve narkotike.
Në Qarkun tonë këtë vit nuk është evidentuar asnjë rast i kultivimit të bimëve narkotike.
Për çdo emergjencë telefono falas Policinë e Shtetit në nr 112 ose denonco paligjshmërinë në aplikacionin Komisariati Digital!
