Delawie kërkon hetime pa ndërhyrje politike për veteranët e rremë

Ambasadori Amerikan në Prishtinë, Greg Delawie, ditën kur tashmë ish-prokurori special, Elez Blakaj, kishte thënë dorëheqje, e kishte quajtur “ditë të trishtuar për sundimin e ligjit në Kosovë”.

Ambasadori Delawie më shqetësuese e konsideronte faktin që prokurori po hetonte një skemë masive mashtrimi me pensione.

Ndërsa sot, përmes një postimi në Twitter, tha se po vëzhgon hetimet ndaj listave të veteranëve, duke bërë thirrje që këto të bëhen pa kërcënime, frikësim apo ndërhyrje politike, raporton Koha.net.

“Jam duke vëzhguar me kujdes hetimet për korrupsionin në dhënien e përfitimeve për veteranët. Çështja duhet të trajtohet pa kërcënime, frikësim dhe ndërhyrje politike. Qytetarët, e sidomos veteranët, duhet ta shohin sistemin teksa vendos drejtësi”, thekson Delawie.

Elez Blakaj, tashmë ish-prokuror i Prokurorisë Speciale, ka dhënë dorëheqje nga ky institucion në fillim të javës që lamë pas. Ai u përball me lloj-lloj akuzash e fyerjesh nga krerët politikë në vend, ku Haradinaj e quajti “hajn të pulave” e “pishpirik” e Veseli “frikacak”, por pati edhe përkrahje nga shoqëria civile.

Pas letrës së tij publike ku inkriminoi emra udhëheqësish të institucioneve më të rëndësishme në vend, si Kadri Veselin e Aleksandër Lumezin, në vend nisën protestat. Një e tillë është organizuar edhe për nesër me fillim në orën 18:00, përmes së cilës po kërkohet dorëheqja e Lumezit dhe vetting sistemit të drejtësisë.