Thaçi e rikonfirmon, mbetet pranë idesë për korrigjim të kufirit

Disa ditë para takimit të radhës me homologun e tij serb, Aleksandar Vuçiç, presidenti i Kosovës Hashim Thaçi ka takuar krerët institucionalë të Kosovës.

Në zyrën e tij, kanë qenë kreu i Kuvendit, Kadri Veseli, kryeministri Ramush Haradinaj dhe tre zëvendëskryeministrat Behgjet Pacolli, Fatmir Limaj dhe Dardan Gashi. Aty u diskutua për dialogun, derisa mungonin përfaqësuesit e opozitës.

Presidenti Thaçi ka vazhduar të mbështesë idenë e proklamuar që marrëveshja paqësore me Serbinë të përfshijë edhe korrigjimin e kufirit. Ai ka deklaruar se marrëveshja nuk do të përfshijë “ndarje dhe as shkëmbim të territorit me Serbinë”, por sipas tij, mund të bëhet një korrigjim duke përfshirë brenda territorit të Kosovës komunat Preshevë, Bujanoc e Medvegjë, raporton RFE.

“Asnjë marrëveshje nuk do të ndodhë nga ana e Kosovës pa pëlqimin e plotë të Shteteve të Bashkuara, Bashkimit Evropian dhe NATO-s. Kushdo që del kundër, e kanë gabim”, tha Thaçi.

Këto komente, ai i bëri pas dy takimeve që kishte zhvilluar me liderët politik vendorë si dhe një telefonate që kishte zhvilluar me ndihmëssekretarin amerikan të Shtetit për çështje evropiane dhe euroaziatike, Wess Mitchell.

Çdo marrëveshje eventuale me Serbinë, nënvizoi Thaçi do të dërgohet në Kuvendin e Kosovës për ratifikim.

Paraprakisht, pas takimit të liderëve politikë, kryeministri i Kosovës Ramush Haradinaj tha se në dialogun me Serbinë nuk mund të bisedohet për territorin dhe kufijtë e Kosovës dhe një gjë të tillë, kreu i Qeverisë tha se ia kanë bërë të qartë edhe presidentit Thaçi.

“Kishim një konsultë mes institucioneve, ishte presidenti, ishte kryeparlamentari, ishin zëvendëskryeministrat Limaj dhe Gashi. Në përgjithësi, konsulta ishte rreth dialogut, proceseve në dialog. Nuk kemi biseduar për mënyrën e shkuarjes, kryesisht për parimet e dialogut, pra që dialogu është i nevojshëm, është i rëndësishëm, njohja reciproke është e nevojshme. Procesi i dialogut nuk nënkupton diskutim të territorit, as të kufijve të Kosovës”, tha Haradinaj.

Sipas tij, edhe presidenti Hashim Thaçi është shprehur kundër ndarjes së Kosovës dhe diskutimit të integritetit territorial të Kosovës në bisedimet në Bruksel.

Haradinaj tha po ashtu se roli i opozitës në procesin e dialogut është shumë i rëndësishëm.

“Presidenti shprehu pozicionin e tij se respekton jo vetëm territorin, integritetin, sovranitetin e vendit, por vetëm i ushtron funksionet e veta në bazë të Kushtetutës dhe nuk pranon të diskutohet territori i vendit. Ajo që mendoj që është shumë me rëndësi është që të kemi qëndrim të qartë institucional se territori, kufijtë nuk diskutohen, nuk janë çështje për diskutim në kuadër të dialogut. Pastaj, është shumë me rëndësi që opozia, të gjithë të jenë pjesë e dialogut”, tha kryeministri Haradinaj.

Takimi i radhës në Bruksel, mes presidentit të Kosovës Hashim Thaçi dhe homologut të tij serb, Aleksandar Vuçiç është paraparë të zhvillohet më 7 shtator, në kuadër të dialogut mes dy shteteve që ndërmjetësohet nga Përfaqësuesja e Lartë e Bashkimit Evropian, Federica Mogherini.

Bazuar në deklaratat e dy presidentëve në Forumin Evropian të mbajtur në Alpbach të Austrisë gjatë fundjavës, korrigjimi i kufirit do të jetë pjesa kryesore e marrëveshjes që Thaçi e Vuçiç synojnë të arrijnë.

Mirëpo, partitë opozitare në Kosovë, janë duke tentuar që të ndalojnë presidentin Thaçi që të takohet sërish me presidentin e Serbisë, Aleksandar Vuçiç.

Lidhja Demokratike e Kosovës, e përkrahur edhe nga partitë tjera opozitare, kanë paralajmëruar seancë të jashtëzakonshme më 4 shtator, tri ditë para takimit të dy presidentëve.

Në këtë seancë, ata kanë paralajmëruar se do të nxjerrin një rezolutë, përmes së cilës do të mund ta ndalojnë presidentin Hashim Thaçi që të vazhdojë dialogun me Vuçiqin.

Kjo kërkesë për seancë të jashtëzakonshme është quajtur absurde nga kreu i Kuvendit Kadri Veseli. Derisa partnerët e PDK-së në koalicionin qeverisës, Aleanca për Ardhmërinë e Kosovës dhe Nisma Socialdemokrate, e kanë mbështetur këtë kërkesë të opozitës për seancë të jashtëzakonshme.