Paralajmërimi për Edi Ramën/ Basha: Do të përballesh me përplasje civile!
Premton se nuk ka as bashkëqeverisje dhe as pakt politik me Edi Ramën, vendi ndodhet në një krizë totale dhe krimi është njësh me pushtetarët, rasti i Strasburgut dëshmon se si Rama kontrollon sistemin e drejtësisë dhe Vetingun, ndërsa i bënë të qartë kryeministrit se në rast se e sjellë Ligjin për Teatrin në seancë, do të përballet me përplasje civile. Kështu kryetari i Partisë Demokratike, Lulzim Basha në një takim me gazetarët duke folur për situatën e krijuar në vend tha se Edi Rama nuk gjen kohë për qytetarët që i adreson në internet por ama ulet gju më gju me kriminelët.
“Të jemi fare të qartë: nuk ka as bashkëqeverisje me Edi Ramën dhe as pakt politik me të”, tha Lulzim Basha ndërsa renditi skandalet e kësaj vere që dëshmuan bashkëqeverisjen e Ramës me krimin.
“Vendi është në krizë të trefishtë: krizë e sigurisë, kushtetuese dhe ekonomike. Kjo verë nuk ka qenë e nxehtë vetëm për shkak të motit, por edhe në kuptimin e vazhdimit të skandaleve që konfirmojnë krizën e trefishtë. Kryeministri qytetarëve u ka ndërtuar një faqe interneti, ndërsa kohën e kalon me kriminelët. Me ta ka akses të drejtpërdrejtë. Ulet gju më gju me ta dhe me ministrin e Brendshëm. Skandalet që plasin njëri pas tjetrit bëjnë që të harrohet skandali i mëparshëm,”
tha Basha duke shtuar se ministrat e deputetët e maxhorancës gëzohen për skandalet e njeri-tjetrit.
“Plasi skandali i Xhafajt, u gëzua Tahiri. Plasi skandali i Çyrbjas u gëzua Xhafaj. Plasi i Ballës, u gëzua Çyrbja, plasi skandali i Bibës, u gëzuan këta të gjithë”, tha kryetari i PD, dhe duke e quajtur tallje reagimin e kryeministrit për sulmin ndaj gazetares Klodiana Lala, tha se një sulm i tillë bëhet vetëm kur krimi ka mbështetje politike:
“Dje, u sulmua me automatik shtëpia e gazetares Klodiana Lala. Një sulm i tillë bëhet vetëm kur krimi ka mbështetje politike. I turpshëm dhe i neveritshëm është reagimi i prokurorisë, që duhet të nisë veprimet menjëherë për një hetim gjithëpërfshirës. Tallje është Twitteri i Edi Ramës. Gazetarja kishte denoncuar aferën “Çyrbja”. Përgjimet tregojnë se si deputeti socialist komunikon në telefon me një anëtar të bandës së Emiliano Shullazit, duke iu referuar bandës me “NE”. Sot e kësaj dite nuk ka reaguar prokuroria”, u shpreh Basha duke theksuar se kërcënimi i gjyqtarit shqiptar në Strasburg, Ledi Bianku dëshmon se si Edi Rama kontrollon sistemin e drejtësisë dhe vetingun.
“Skandali që shpërtheu para disa ditësh me gjykatësin në Strasburg tregon sesi Edi Rama kontrollon sistemin e drejtësisë dhe vettingun. Kur dërgohen emisarët e Ramës në Strasburg që të kërcënohet dhe joshet gjyqtari atje, imagjino se çfarë ndodh këtu!
Imagjinoni se çfarë presioni u bëhet atyre komisionerëve të vettingut që nuk vijnë nga paradhoma e Edi Ramës, se ka nga ata që janë kontigjente kriminale, subjekte të Ligjit Antimafia, që i ka jo në xhep por në poture, të tjerëve mendoni se çfarë presioni u bëhet. Nga Ardian Dvorani tek Dritan Halluri me shokë. Të paktën 11 të tillë, gjyqtarë dhe prokurorë, që qartësisht dhe nga raportet e Vetingut, dukshëm nuk plotësojnë kriteret e figurës por i duhen Edi Ramës për të mbrojtur vjedhjet e Edi Ramës dhe kontigjnetin kriminal.”
Kryetari i Partisë Demokratike, Luzim Basha në fund u shpreh edhe për dialogun Kosovë-Serbi dhe çështjen e kufirit të Kosovës
“Sovraniteti i Kosovës është në duart e popullit të Kosovës dhe ai është i sanksionuar nga paketa Ahtisari dhe është njohur nga 111 vende është njohur me kufijtë përkatës. Si PD e mbështesim dialogun për të çuar në normalizimin e mardhënieve Prishtinë – Beograd drejt anëtarësimit të plotë të Kosovës në BE dhe në NATO. Paketa Ahtisari nuk lë asnjë vend për mëdyshje ajo përcakton qartë. Kjo paketë është themel i paqes dhe stabilitetit në rajon. Ne i qëndrojmë pranë çdo përpjekje për dialogun në Kosovë dhe duke mbështetur sovrantitetin dhe integritetin territorial të Kosovës”.
