Pushteti i krimit/ I forti i Laçit i drejton armën gazetarit, Shefi i Policisë: ”Jam me leje, të fala”…
Krimi nuk ka të ndalur. Sot, gazetari Julian Shota, është kërcënuar me jetë në krye të detyrës.
Gjithçka ndodhi pas shpërthimit të një tritoli në ambientet e një lokali në lagjen nr.4 në Laç. Shota, sëbashku me ekipin e xhirimit të Report Tv, mbërriti në vendin e ngjarjes për raportimin e asaj që kishte ndodhur. Shpërthimi ka ndodhur rreth orës 01:30 të mëngjesit të kësaj të hëne. Tritoli ishte vendosur tek hyrja e lokalit në pronësi të Llesh Burakut, 53 vjeç, banues në Laç. Nga shpërthimi nuk raportohet për të lënduar, por vetëm dëme materiale.
Duke tentuar të pengojë punën e gazetarëve, fillimisht 53-vjeçari ka filmuar me telefon automjetin e gazetarit, Julian Shota, duke e kërcënuar se nëse transmeton ngjarjen në televizion do ketë punë me të. Sipas Burakut, as policia nuk do ta bënte publike ngjarjen.
Si të mos mjaftonte kjo, Llesh Buraku ka nxjerrë edhe një armë zjarri tip pistoletë, të cilën ia ka drejtuar gazetarit, Julian Shota, duke e kërcënuar me jetë. Në atë moment, siç rrëfen edhe vetë gazetari Shota, kanë ndërhyrë disa të afërm të 53-vjeçarit, duke i bllokuar krahun për të mos lejuar përshkallëzimin e situatës. Nën kërcënimin e armës, Buraku ka kërkuar që t’i dorëzojnë edhe telefonat, por gazetari Shota dhe kolegët e tij klanë refuzuar ta bëjnë një gjë të tillë.
Shefi i policisë-gazetarit: Jam me leje, të fala!
Në vendin e ngjarjes nuk ka pasur asnjë efektiv policie, ndërsa shefi i komisariatit të Laçit, Erdit Rreçeku, i kontaktuar nga gazetarët për ngjarjen e rëndë, është përgjigjur se ndodhet me pushime. “Jam me leje. Të fala”, ka qenë përgjigjia e kreut të policisë së Kurbinit. Buraku është shoqëruar nga policia pasi ngjarja u transmetua në media, ndërsa edhe Prokuroria ka nisur hetimet.
Llesh Buraku personazh i njohur për policinë
Llesh Buraku është një personazh i njohur për policinë. Tre vite më parë ai u arrestua pasi dhunoi një inspektor të Inspektoratit të Shëndetit Publik, gjatë inspektimit në lokalin e tij. Për dhunën e ushtruar nga një punonjësi të shtetit që po ushtronte detyrën, Buraku u “dënua” nga Gjykata vetëm me një gjobë prej 150 000 lekë të reja.
Kjo ngjarje vjen vetëm pak ditë pas sulmit me armë zjarri ndaj banesës së prindërve të gazetares Koldiana Lala, në të cilën ndodheshin edhe dy vajzat e saj të mitura.
Njoftimi i policisë:
Kurbin
Më datë 03.09.2018, rreth orës 02:00, në lagjen Nr.4 në Laç, në derën e jashtme të lokalit ” Bar-Kafe” në pronesi të shtetasit Ll.B. vjeç 53, ka shpërthyer një sasi lëndë eksplozive, ku si pasojë ka vetëm dëme materiale.
Po punohet për identifikimin dhe kapjen e autorit. Materialet proçedurale u referuan Prokurorisë së Rrethit Gjyqësor Kurbin për veprën penale ” Shkatërrim prone me eksploziv” parashikuar nga neni 152 i Kodit Penal./shqiptarja.com/
