Kush po kërkon 31 Mars, kuksianët, politikanët apo qeveria?

Duke u afrue data për tarifimin e rrugës së kombit, po rritet edhe tensioni qytetar për kundershtimin e këtij tarifimi. Ajo çka mbetet e pa qartë deri tash asht se në çfarë mënyre do ta kundershtojnë qytetaret këtë tarifë.

– A do të kundërshtohet si me 31 Mars, për të cilën ka presion qytetar për me ndodhë, apo do ketë forma të tjera?
Sido, një gja asht e sigurtë se kjo tarifë nuk po pranohet me bindje dhe vullnet por ka gjasa që të imponohet forcërisht prej qeverisë.

– A do të rezistojë ky imponim për 35 vite? Kjo asht e dyshimtë se mundet me ndodhë.

– A ishte zgjidhja e ofrume prej qeverisë ajo ma e mira që e qetëson situaten? Edhe kjo nuk duket e tillë.

Le ti analizojme ma në detaje.

– Nëse qytetarët do të kundershtojnë këtë taksë si me 31 Mars, atëhere do ishim në të njëjtën situate por me kahe të kunderta, dmth nga protestues të vendosun e të bashkuem dhe qeveri të pa pregatitun për këtë revoltë, në protestues të trysnuem nën presion jetik e qeveri të pregatitun për reagim të ashpër kunder protestuesve. Përfundimi i kësaj proteste merret me mend lehtësisht, pa pasë nevoje për ndonjë intelegjencë të madhe. E në këtë situate, rekomandimi i disa politikanëve se çfar duhet të bëjnë qytetarët Kuksianë asht i pa vend, duke pasë parasysh se janë po keta që kanë firmosë këtë kontratë që sot thonë mos e zbatoni. Këta “këshillues” devijojne thelbin e qënies së tyne si ligjvenës duke dhanë mendime nga kafet e Tiranës, në vend se të marrin inisiativa ligjore në parlament për korrigjimin e katrahurës që vetë e kanë shkaktue. Ligjvënësit, firmëtar të kontratës, së bashku me pjesën tjetër të madhe të opozitës le të guxojnë haptazi ta pranojnë gabimin dhe me inisiativë ligjore të kerkojnë ndryshimin me ligj të formës së taksimit të rrugëve, referue ndonjë modeli që ata duhet ta zgjedhin. E ndoshta kjo do ishte forma më e mire për zgjidhjen e kësaj situate.

– Qeveria ka ofrue një zgjidhje të kamuflueme, e natyrisht si e tillë nuk e qetëson situatën por e len pezull. Zgjidhjet afatgjata janë të thjeshta, e kjo nuk asht e tillë sepse ka shumë komplikimë, të fshehta dhe paqartësi. Përplasja e qytetarëve do jetë pikerisht nga konflikti midis pritshmërisë së premtueme në këtë 5 mujor dhe realitetit që do të ndodhë. Kjo do na çojë pashmangshmërisht në një situatë të pa dëshirueshme. Nëse u kerkon qytetarëve shqiptarë që të pranojnë me imponim diçka që ata nuk jan dakort, e ketë ua kërkon për 35 vite, atëhere je gabim. Nuk mundet me funksionue edhe ideja se njerëzit do të mesohen me traun, mjafton sa të filloje e të bahet rutinë. Jo. Në çdo kalim, cilido qytetar do ndalet aty për një pagesë e rrjedhimisht do nervozohet me të, me prezencën e traut dhe tollin. Ky lloj nervozizmi i ngadaltë e nga pak, akumulohet e shpërthen për ndonjë arsye që askush nuk mund ta parashikojë. Për këtë arsye, ky imponim 35 vjeçar nuk mund të funksionojë, e si i tillë, nuk duhesh konsiderue.

– Jo vetëm për arsyet që renditëm ma nalt por edhe për faktin se ka zgjidhje ma të mira, mundemi me thane së qeveria ka gjetë zgjidhjen e gabueme. Trau hiqet ose vihet me ligj, ama me kushtin që ligji të jetë i drejtë. Në rastin tone duket se ky kusht nuk asht përfillë. Çfar e pengon qeverinë tonë që të marre si model ndonje nga vendet e Europës për mënyrën e taksimit dhe mirmbajtjes se rrugëve, dhe ta aplikoje atë saktësisht këtu? Modeli i Austrise dhe Sllovenise pershembull do ishte shum i pranueshëm për të gjitha palët.

Duke përdore edhe ne këtë sistem që asht kombinim i vinjetës (javore, mujore ose vjetore) për mjete deri ne 3,5 ton dhe toll-it për mjetet e randa, jo vetëm do zgjidhej problemi me popullsine lokale, por automatikisht zgjidhej në mënyrë afatgjatë mirmbajtja e rrugës së kombit dhe e të gjitha rrugëve në Shqipni.

Gjithashtu, me një marrveshje me Kosovën, (të cilen e demtojme shume me mënyrën aktuale) do kishim mundësi për një unifikim dhe vlefshmëri të vinjetave, siç e kemi me siguracionet. Këtë model e ka edhe Austria me Slloveninë për një segment rrugor dhe nje tunel.

Nëse do kishte dashamirësi, këto variante do konsideroheshin, e në mungesë të saj, zgjidhjet janë të vështira.