Bëri thirrje për përfshirjen e policisë në fushatë, hetimi ndaj Ramës përfundon në gjykatë

Gjatë fushatës për zgjedhjet parlamentare të 25 qershorit, Kryeministri Edi Rama i drejtoi një thirrje punonjësve të Policisë së Shtetit që të angazhohen në fushatë dhe të mbledhin vota në favor të Partisë Socialiste.

Në atë kohë, Rama tha se pas orarit të punës, punonjësit e policisë të lënë kapelet dhe të angazhohen në fushatë. Thirrja u bë gjatë një mitingu elektoral në Berat.

Lidhur me këtë thirrje të Kryeministrit, LSI depozitoi një padi në prokurori. Hetimet u mbyllën pa nisur mirë, pasi Kryeministri kërkoi ndjesë lidhur me atë çka kishte thënë.

Por duket se vendimi i Prokurorisë nuk është mirëpritur nga LSI, e cila i është drejtuar Gjykatës së Beratit për të rihapur hetimet.
Seanca gjyqësore do të mbahet në 16 maj, por duket se në kushtet kur sistemi i drejtësisë është nën presion, kur Gjykata Kushtetuese dhe gjyqtarët e prokurorët nën ethet e Vettingut, vështirë se mund të merret një vendim që mund të vendosë Kryeministrin nën hetim.