Çudira serbe, Vuçiç: Serbia në rrugë evropiane me Kinën dhe Rusinë

Kryetari i Partisë Përparimtar Serbe, SNS, dhe Presidenti i Serbisë, Aleksandar Vuçiç duke folur në ceremoninë e 10 vjetorit të themelimit të partisë, tha se Serbia është në rrugën evropiane, që dëshiron ti takojë shoqërisë evropiane tek e cila beson, por edhe të ruaj dhe kultivon marrëdhënie të mira dhe miqësore me Kinën dhe Rusinë. Por çudia serbe nuk mbaron këtu!

Duke folur para të pranishmëve në qytetin e Kralevës, renditi sukseset e qeverisjes së tij ndërsa theksoi se ajo që do të ndodhë në rajon në të ardhmen, në masën më të madhe do të varet nga serbët.

“Kam vërejtur se shumica dëshirojnë të dëgjojnë fjalë të zjarrta dhe të rënda, unë dua që fjalimi im të jetë i mërzitshëm por njerëzit ta dijnë se Serbia është në rrugën drejt një porti të sigurt.”

Nuk harroi as Kosovën me këtë rast, duke përsëritur se nuk ekziston ai lloj presioni ose njeriu që mund të bëjë presion mbi Serbinë që të heq dorë nga interesat vitale kombëtare, shtoi:

“Për ata që nga jashtë mendojnë se me presion mund ti marrin Serbisë të gjitha, dhe të tjerëve tu japin të gjitha, u kam thënë – as në ëndërr nuk do ta shihni. Që ta kenë të qartë se kjo nuk do të ndodhë kurrë,” tha Vuçiç duke kundërshtuar gjithçka por duke i dalë nga goja se Beogradi është i gatshëm për kompromis, dhe nuk do të lejojë që të përçmohet Serbia dhe populli serb.

Aleksandar Vuçiç i cili në këtë takim erdhi me paraardhësin e tij, Tomisllav Nikolliç dëshmoi me fjalën e tij se pse Serbia është në këtë gjendje mizerabël kur me këtë mendësi është kryetar i një partie që quhet, Partia Përparimtare Serbe.

Por ai që i kishte liruar kolltukun në parti dhe shtet, Vuçiçit, Tomisllav Nikolliç, ishte edhe më rëndë:

“Asgjë dhe askush nuk është më i madh dhe më i rëndësishëm se Serbia. Pikërisht për këtë arsye ka lindur grupi parlamentar ‘Përpara Serbi’, dhe nga ai lindi SNS, në kohë shumë të vështira, kur për Serbinë nuk mendonin as pushteti dhe as opozita,” tha Nikolliç duke shtuar se sikur të vazhdonim me këtë politikë, nga Serbia nuk do ngelte më asgjë:

“Unë do të thoja, e rrëmbyem pushtetin dhe ia dhamë popullit, qytetarëve të Serbisë të cilët as që e kishin idenë se çfarë po I pret por që u mbështetën vetëm tek SNS,” tha Tomisllav Nikolliç.

Kryetari i Partisë Përparimtare Serbe, SNS, dhe Presidenti i Serbisë, Aleksandar Vuçiç tha se ishte përzgjedhur qyteti i Kralevës për këtë përvjetor sepse këtu do të hapen dy fabrika gjermane “Leon” ku do të punësohen 5.000 punëtorë,  dhe “Taj grup” turke ku do të punësohen 2.500 punëtorë.