Arrestohet “postieri bombë”/ Presidenti Trump: Punë e jashtëzakonshme e FBI!
Presidenti i Shteteve të Bashkuara, Donal Trump ka lavdëruar punën e jashtëzakonshme të policisë federale pas arrestimit të një personi në Florida gjatë hetimit të pakove shpërthyese që iu dërguan kundërshtarëve të tij politik
“Dua të lavdëroj FBI, Shërbimet sekrete, Ministrinë e Drejtësisë dhe forcat e rendit në gjithë vendin,” tha Presidenti Trump nga Shtëpia e Bardhë duke vlerësuar se kërkimi i të dyshuarit në këtë aferë i ngjante kërkimit të gjilpërës në kashtë.
Presidenti nuk saktësoi identitetin e të arrestuarit dhe as motivet e tij: “Këto janë vepra të turpshme që nuk e kanë vendin në SHBA,” tha Presidenti duke shtuar. “Nuk mund të lejojmë që dhuna politike të lëshojë rrënjë në Shtetet e Bashkuara. Duhet ti tregojmë botës se jemi të bashkuar.”
Ministria amerikane e Drejtësisë bëri publike arrestimin e një personi të cilën disa media e kanë identifikuar, Cesar Sayoc Jr, 56, vjeç i cili jeton në Florida dhe është person me precedent penal.
Por pas informacioneve të kompletuara nga organet ligjzbatuese, edhe autoritetet amerikane zyrtarizuan personin e arrestuar, si një burrë 56 vjeç, i lidhur me rastin e dërgimit të disa pakove shpërthyese drejt kritikëve të presidentit amerikan, Donald Trump, si i dyshuari Cesar Sayoc. Ai përballet me pesë akuza duke përfshirë pako shpërthyese dhe kërcënim të ish-presidentëve.
Ndryshe, në ditët e fundit, 14 pako janë nisur drejt figurave të larta amerikane, duk përfshirë ish-presidentin e SHBA-së, Barack Obama dhe aktorin Robert de Niro.
Dy pako tjera janë gjetur në Florida dhe Nju Jork sot në mëngjes.
Këto incidente kanë ndodhur në vetëm më pak se dy javë para zgjedhjeve për Kongresin amerikan dhe situata cilësohet tejet tensionuese.
Zyrtarët për zbatimin e ligjit theksojnë se Sayoc jeton në Aventurë të Floridas. Ai ka pasur lidhje edhe me New Yorkun dhe është i regjistruar si republikan.
Në vitin 2002 ai është arrestuar për kërcënimeve me sulm me bombë në Maiami dhe është liruar me kusht lidhur me këtë rast.
Ai ka të kaluar kriminale që daton nga viti 1991 duke përfshirë akuzat për mashtrime.
