Dëbimi i gylenistëve/ Tetë zyrtarë të MPB me deklarata kontradiktore

Tetë zyrtarë të punësuar në Ministrinë e Brendshme të Kosovës  që punojnë në Aeroportin e Prishtinës, kanë treguar para Komisionit hetimor atë që ka ndodhur në ditën e 29 marsit, kur 6 shtetas turq që jetonin në Kosovë u arrestuan dhe u dëbuan në Turqi, raporton KTV.

Që në nisje të Komisionit, është marrë vendim që raportimet të bëhen prapa dyerve të mbyllura dhe pa praninë e mediave.

I pari që ka raportuar ka qenë shefi i Departamentit për të huajt në Aeroport, Fazli Fazliu, i cili edhe pse u intervistua për rreth një orë e gjysmë, u tha mediave se ai është ftuar gabimisht nga Komisioni, por kjo u mohua nga Komisioni.

Pas tij, kanë raportuar edhe 7 zyrtarë të tjerë policorë.

Kryetari i këtij komisioni, Xhelal Sveçla, nga Vetëvendosje, tha se ky komision dëshiron ta kuptojë të vërtetën se çfarë ka ndodhur ditën kur gjashtë turqit ishin kapur dhe dëbimin.

Sveçla tha se ka pasur deklarata kontradiktore dhe mohoi faktin se një zyrtar policor është intervistuar gabimisht.

Komisioni Hetimor ka nisur hetimet me raportimin e kryeshefes së Inspektoratit Policor të Kosovës, Miradije Kelmendi, mbledhje kjo po ashtu e mbyllur për media.

Gjatë nëntorit, raportimet do të shpeshtohen, ku pritet që si dëshmitarë të jenë edhe presidenti, kryeministri dhe kryeparlamentari, si dhe shumë zyrtarë të institucioneve tjera, përfshirë edhe ministrin Pal Lekaj.

Në  atë kohë, KTV zbuloi se Ministria e Infrastrukturës kishte shkelur Rregulloren për aprovimin e fluturimeve Charter dhe Taxi, duke i dhënë leje për operim kompanisë ajrore “Birlesik Insaat” një ditë para kohe.

Aeroplani i kësaj kompanie që erdhi nga Ankaraja, ateroi në Kosovë mëngjesin e 29 mars dhe u kthye prapa po atë ditë rreth orës 17 e 30, dhe mendohet se me të janë bartur shtetasit turq që u arrestuan nga Policia e Kosovës dhe AKI.