A iku Gruevski në Hungari nga Shqipëria? Ambasada hungareze heshtë policia ka filluar verifikimet…

Mundësia që Ish kryeministri Nikolla Gruevski, të jetë larguar nga Maqedonia për në Hungari përmes Tiranës, si lajm u përhap nga e përditshmja serbe “Politika” ndërkohë vazhduan edhe raportimet se Gruevski ka ardhur në Tiranë me pasaportë false; është strehuar në ambasadën hungareze një natë dhe një ditë më pas është nisur me avion nga Rinasi.

Raportet ishin të pasakta, raporton Alsat-M duke shtuar se në momentin kur përmendej se ai ishte larguar me avionin e linjës “Malev”, kompani ajrore që ka falimentuar vite më parë. Madje, disa media shkruan se ai ka qenë i veshur si femër.

Ambasada hungareze në Tiranë, e kontaktuar nga Top Channel, as nuk pohoi dhe as nuk mohoi raportet e mediave rajonale, por u mjaftua me një përgjigje të thatë se “nuk komentojnë për procese që janë në zhvillim e sipër”, duke iu referuar faktit se kërkesa për azil e Gruevskit po shqyrtohet nga Budapesti.

Ndërkohë Policia e Shtetit ka nisur verifikimet në dy pikat kufitare Rinas dhe Qafë Thanë, pas lajmit se Gruevski ka kaluar në Hungari përmes Shqipërisë. Burime për Ora News konfirmojnë se do kontrollohen listat e personave që kanë hyrë dhe dalë nga territori shqiptar, si edhe do të sekuestrohen kamerat e sigurisë në dy pikat kufitare

Në fund, raporton se Gruevski po qëndron në hotelin “Corinthia” të kryeqytetit hungarez dhe mbetet e paqartë se si arriti deri aty.