Vrasja e Ivanoviçit, një muaj paraburgim ndaj tre të dyshuarve

Gjykata Themelore në Prishtinë ka caktuar masën prej një muaji paraburgim, ndaj dy të pandehurve serbë me iniciale N.S dhe M.R, të dyshuar për veprën penale “vrasje e rëndë”, lidhur me vrasjen e politikanit serb, Oliver Ivanoviç. Ndërkaq, të pandehurit D.M po ashtu i është caktuar masa prej një muaji parabugim, për veprën “zbulim i sekretit zyrtar” raporton RFE.

“Të pandehurve N.S, M.R dhe D.M iu është caktuar masa e paraburgimit në kohëzgjatje prej një (1) muaji për secilin veç e veç, nga data 23.11.2018 deri me datë 23.12.2018”, thuhet në njofimin e Gjykatës Themelore.

Policia e Kosovës, me kërkesë të Prokurorisë Speciale, të premten arrestoi katër persona në veri të Mitrovicës, tre prej të cilëve janë të dyshuar se kanë lidhje me vrasjen e politikanit serb, Ivanoniç.

Ndërkaq, personi i katërt i arrestuar nuk ka të bëjë me rastin Ivanoviç.

Gjykata Themelore thotë se masa prej një muaj paraburgim “është masë adekuate dhe e domosdoshme në këtë fazë të procedurës, për sigurimin e pranisë së tyre në procedurën penale dhe zhvillimin e pa penguar të procedurës”.

Në njoftimin e Gjykatës po ashtu theksohet se masa e paraburgimit prej një muaji parandalon që të pandehurit të qëndrojnë në liri ku “do të mund të përsërisnin veprat e njëjta apo të ngjashme penale”.

Policia e Kosovës të premten ka njofuar se është në kërkim edhe të një personi tjetër me iniciale M.R, i përkatësisë serbe, lidhur me vrasjen e Ivanoviçit.

Politikani serb, Oliver Ivanoviç ishte vrarë më 16 janar 2018, para selisë së partisë së tij në veri të Mitrovicës. Ai ishte kryetar i Iniciativës qytetare “Liria, Demokracia dhe Drejtësia”.