Para kryeministrisë/ Minatorët në protestë: Edi Rama mbaje fjalën…

Ashtu siç kishin paralajmëruar, minatorët edhe sot kanë vazhduar protestën para kryeministrisë ku kanë qëndruar gjatë gjithë natës, duke i kërkuar kryeministrit Edi Rama që të mbajë fjalën e dhënë për statusin e minatorit.

Askush nga kryeministria nuk tregoi interes për ti takuar dhe sqaruar, thonë ata por theksuan se pa zgjidhjen e këtij problemi nuk do të ndalojnë protestën dhe do të qëndrojnë para kryeministrisë.

“Fatkeqësisht asnjë nuk ka hapur asnjë rrugë për takim. Dje jemi detyruar t’i nisim në shtëpi më të moshuarit. Ne kemi qenë këtu gjithë natën në shi. Kemi një kërkesë dhe kërkesa jonë ka shumë kohë që flitet.  Tani do të fillojnë të vijnë minatorë të tjerë, përfaqësues të tjerë dhe do të qëndrojmë deri në zgjidhje të problemit. E kam njoftuar kryeministrin që në datë 16 i kam thënë se do të rri në shi borë këtu,” tha njëri prej minatorëve

Për këtë situatë ato bëjnë fajtore Ministrinë e Financave që sipas tyre ka miratuar një projektligj që nuk ka lidhje me statusin e minatorit.

“E mbani fjalën kryeministër? I keni premtuar popullit minator statusin e minatorit. Fatkeqësisht Ministria e Financave ka nxjerrë një projekligj turpi. Ne kemi miratuar një status që është për minatorin, jo këtë që ka nxjerrë ministria e Financave që na fut me naftëtarët. Pa para nuk ka status, qëndron problemi se ata nuk janë të gatshëm që të na japin statusin e minatorit,” theksojnë ata duek përsëritur se do të protestojnë deri në zgjidhjen e çështjes së tyre ashtu siç ka premtuar kryeministri Edi Rama para një viti.