Unaza e Re/ Protestë me flamur, Banorët: Ditë feste dhe beteje kundër këtij regjimi…

Kjo është një ditë feste, por edhe beteje kundër këtij regjimi. Kështu shprehen në Ditën e Flamurit banorët tek Unaza e Re që preken nga projekti i Unazës së Madhe ndërkohë që vazhdojnë me ditën e 25 të protestës së tyre por që në rrespekti të kësaj feste të shenjte shpalosën edhe një flamur kombtar të gjatë 6 metra.

“Do e vazhdojmë protestën deri në fund dhe shtëpite nuk i dorëzojmë. Jemi shqiptarë dhe nuk jemi serbë. Do e ngrejmë flamurin dhe shtëpitë tona do i mbrojmë se i kemi me gjak. Ne kemi mbështetjen e banorëve sepse kërkojmë shtëpitë tona dhe nuk i nxjerrim fëmijët jashte,” theksojnë banorët të cilët edhe sot kanë blokuar rrugën kryesore ndonëse provokimet nga policia vazhdojnë si para, gjatë dhe pas protestës, por ata janë të vendosur:

“Të gjithë bashkë jemi për një qëllim. Kjo është ditë festë dhe ditë beteje kundër këtij regjimi. Vetëm ata në kohën e Enver Hoxhës silleshin në këtë mënyrë. Veprojnë natën në mënyrën më të turpshme. Po provokohemi çdo ditë nga policia.”

Një nga banorët, për News 24 tha se procesi i legalizimit tek “Unaza e Re” është bërë më miqësi dhe me ndërhyrje, ndërkohë i bëri thirrje qeverisë të marrë masa sa nuk është bërë vonë.

“Legalizimet janë bërë me miqësira me ndërhyrje. Këtu ke një objekt që gjysma është e legalizuar dhe gjysma jo. Projekti të vijojë, por ne duhet të dëmshpërblehemi. Unzën e re e kemi ndërtuar ne, i bëj thirrje të mendojë mirë. Më mirë tani se më pas do të jetë vonë,” tha njëri prej tyre ndërkohë një tjetër protestues sqaroi se kur do të bëhet tërheqja e tyre:

“Kur s’u tërhoqën dje që binte shi, si mund të tërhiqemi sot ne. Kur të tërhiqet oligarkia atëherë edhe ne do të tërhiqemi!”

Ndryshe, edhe sot të pranishëm në protestë ishin deputetët e opozitës.