“Trafikanti që fshihej në makinën e Mark Frrokut”/ Policia: arrestohet i “forti i Shkodrës”, ndërtuesi që falsifikoi vula…
Policia e Shkodrës arrestoi 44-vjeçarin Bardhok Pllanaj, banues në fshatin Shtoj i Vjetër.
Emri Pllanajt doli që në vitin 2015 kur u vu nën akuzë deputeti i Pukës, Mark Frroku, se kishte marrë Pllanajn në makinën e tij kur ky ishte në ndjekje nga policia si i dyshuar për trafikimin e një sasie droge nga Laguna e Vilunit.
Policia thekson se arrestimi i tij u bë pasi këtë të hënë prokuroria e rrethit gjyqësor Shkodër lëshoi urdhrin e ekzekutimit dhe gjykata e caktoi masën e sigurimit “Arrest në burg”, për veprat penale “Pastrimi i produkteve të veprës penale”, “Falsifikimi i vulave, stampave ose formularëve”, “Ndërtim pa leje”.
Policia thekson se në bashkëpunim me Prokurorinë e Shkodrës, pas një hetimi disa mujor bënë të mundur dokumentimin e aktivitetit kriminal të Bardhok Pllanajt, i cili prej disa vitesh kishte filluar ndërtimin për qëllime përfitimi të një objekti 10-katësh pa u pajisur me lejet përkatëse të lëshuara nga organet kompetente.
“Gjatë hetimeve të kryera ka rezultuar se ky objekt është financuar nga të ardhura që dyshohet që kanë ardhur si rrjedhojë e aktivitetit kriminal që ka kryer ky shtetas më parë, e për këtë arsye është vendosur dhe masa e sigurimit pasuror me vendim gjykate “Sekuestro preventive.”
Ky objekt 10-katësh që ndodhet në qytetin e Shkodrës në pronësi të tij kap vlerën 2 milionë euro.
Si iu fsheh policisë në makinën e deputetit
Bardhok Pllanaj, sot 44 vjeç i arrestuar këtë të hënë në Shkodër për shkak të ndërtimit të një pallati 10-katësh me vlerë 2 milionë euro tronditi politikën 4 vite më parë. Policia thotë sot se ai nuk e justifikon këtë pasuri që dyshohet se e ka vënë nga aktiviteti i paligjshëm.
Sipas një raporti të policisë në 2014-ën u fsheh në makinën e ish-deputetit Mark Frroku gjatë kohës që ka qenë në kërkim, si person i dyshuar si organizator i një rrjeti të trafikut ndërkombëtar të drogës.
Në vitin 2015, ABC News publikoi dokumente që vërtetonin se ish-deputeti Mark Frroku strehoi në makinë Bardhok Planajn. Ai ishte shpallur person në kërkim pak kohë pas aksionit të njohur si “Operacioni i Vilunit” në zonën e Shkodrës. Pllanaj i ka shpëtuar arrestit të policisë mesnatën e datave 1 dhe 2 tetor 2014, pasi rezultoi i fshehur në makinën e ish-deputetit Mark Frroku.
Në këtë procesverbal thuhet qartë se grupi i operacioneve speciale në Policinë e Shtetit, me autorizim të Prokurorisë për Krime të Rënda, po vëzhgonte prej kohësh të dyshuarin Pllanaj. Sipas raportit të dorëzuar nga agjentët e vëzhgimit, thuhet se Pllanaj gjatë gjithë ditës së 1 tetorit 2014 ishte nën vëzhgim, ku përshkruhen me detaje lëvizjet e tij, makinat që ka ndërruar si dhe lokalet që ka frekuentuar.
Vetëm në darkë, referuar këtij procesverbali, i dyshuari është afruar në lokalin ‘Antika’ tek Shallvaret me makinën e deputetit Mark Frroku. Rreth orës 1 pas mesanate të datës 2 tetor, makina e deputeti Frroku është nisur në drejtim të Laprakës, ku policia, nga frika e largimit të personit të shpallur në kërkim, organizoi një postbllok në Kamëz, pranë Bulavardit Blu. Në momentin që makina afrohet, policia e ndalon atë, por nuk mundet të hapë dyert që ishin të bllokuara nga brenda.
Nga ana e policisë i është bërë e ditur deputetit Frroku se personi që ndodhet në makinë duhet të shoqërohet në Drejtorinë e Policisë, por pas kundërshtisë së deputetit Frroku, agjentët e vëzhgimit kanë komunikuar me specialistin e sektorit për narkotikët e trafiqet, kryekomisar Florjan Pemën duke e vënë në dijeni për kundërshtimin e deputetit Frroku. I gjithë ky debat ka zgjatur për më shumë se 20 minuta dhe më pas agjentët janë larguar duke lënën të lirë Bardhok Pllanajn.
