Intervistë/ Kryetarja e re e Degës Nr.2 në Tiranë: Ja si do ta çojmë drejtë fitores PD-në

Mendon se disa media i dhanë peshë më të madhe se sa duhet zgjedhjes së saj si kryetare të njërës prej degëve më të rëndësishme të Partisë Demokratike në Tiranë, ama e pranon se vërtetë është lajm dhe është krenare për këtë gjë, se është pjesë e Partisë Demokratike ku ka garë reale dhe ka konkurrencë, sepse  aty ku ka garë dhe konkurrencë do të thotë se ka njerëz të lirë dhe ka zhvillim.

Kjo është kryetarja e re e Partisë Demokratike në Degën Nr.2 në Tiranë, Mirlinda Çollaku, e cila në një intervistë ekskluzive për PaFrikë refuzon ta konsideroj veten “ndryshim i madh” por ajo është risi e madhe në PD për shumë arsye.

Është kundër kuotave gjinore si koncept, pasi mendon se në rast se zonjave dhe grave u garantohen kushte të barabarta dhe mundësi të barabarta gare, mund t`ja dalin të jenë shumë më të suksesshme se kufiri i kuotave të përcaktuara për to.

Prioritet padyshim ka risjelljen e Partisë Demokratike në krye të drejtimit të vendit, për të shpëtuar vendin nga kjo organizatë e tipit sicilian që ka zaptuar drejtimin e vendit dhe po i zë frymën shoqërisë shqiptare. Për t’ia arritur këtij qëllimi thekson nevojën e bashkimit të madh, dhe këtu sjell një risi në politikën shqiptare.

Sqaron pse Lulzim Basha është frymë ndryshe jo vetëm në Partinë Demokratike, dhe model i politikanit të ri që sjell një frymë evropiane të politikës, që u  dëshmua edhe me ndryshimet e statutit të Partisë Demokratike.

Vlerëson se Edi Rama moralisht ka rënë, nuk ka legjitimet më të rrijë dhe është e  bindur se shumë shpejtë vendi do të çlirohet nga banda “Rilindja”.

Në fund, është e bindur se kur shpirtrat e lirë bëhen bashkë është vështirë ti thyesh, dhe me ndihmën e gjithësecilit e me besim në Zot, Dega 2 do të dalë faqebardhë në qershor 2019.

Ju jeni ndryshimi i madh në Njësinë Nr.2 ku banoni dhe keni vepruar në kuadër të PD, dhe jo vetëm. A do të vazhdon ky trend edhe me strukturat e Degës që ju do të drejtoni?

Për hir të së vërtetës nuk i jap të njëjtën peshë që i dhanë shumë media, zgjedhjes time në drejtimin e Degës 2, pasi besoj se ishte brenda normalitetit të një procesi zgjedhor, ku ka garë konkurrencë dhe sigurisht në fund do të ketë dhe një fitues. Dega 2 ashtu siç të gjitha degët në të gjithë Shqipërinë kanë përfunduar procesin e plotë zgjedhor në të gjitha nivelet drejtuese nga seksionet e grup seksionet dhe më pas edhe atë të pozicioneve të kryetarëve të degëve.

Kështu që nga kjo pikëpamje unë vij në krye të Degës pas një procesi zgjedhor të përfunduar. Por kjo nuk do të thotë se këtu gjithçka ka mbaruar. Përkundrazi ne sot fillojmë punën dhe duke filluar nga unë, tek çdo drejtues strukture të Partisë Demokratike të Degës 2, do të vlerësohet për punën, performancën dhe rezultatet.

Por diçka vërtetë do të duhet të përbënte lajm dhe unë jam krenare për këtë fakt që jam pjesë e Partisë Demokratike, që në këtë parti ka garë reale ka konkurrencë, dhe aty ku ka garë dhe konkurrencë do të thotë se ka njerëz të lirë dhe ka zhvillim.

PD edhe pse është parti e djathtë grupet vulnerabël deri me sot i ka trajtuar si një e majtë klasike. Ju si femër, që fatkeqësisht në politikën shqiptare trajtoheni si pjesë e kuotës, si do ta drejtoni Degën tuaj, duke aplikuar kuota apo aftësi? 

Lidhur me trajtimin e shtresave vulnerabël mendoj se ne të gjithë si shoqëri duhet të kemi një sens solidarizimi dhe mbështetje të posaçme.

Por nuk mund të bie kurrë dakord që kuotat gjinore të konsiderohen të tilla si mbështetje për një kategori vulnerabël.

Unë besoj fortë tek mundësitë e barabarta, por ne kurrsesi nuk jemi njerëz të barabartë sepse dikush është më i talentuar se unë dhe unë mund të jem më shumë apo më pak se dikush tjetër.

Dhe nga kjo pikëpamje kam qenë dhe do të jem kundër kuotave gjinore si koncept, pasi mendoj se në rast se zonjave dhe grave u garantohen kushte të barabarta dhe mundësi të barabarta gare, mund t`ja dalin të jenë shumë më të suksesshme se kufiri i kuotave të përcaktuara për to.

Por në thelb jam kundra çdo lloj diskriminimi, qoftë edhe kur ky është pozitiv, si në rastin e kuotave.

Ju e merrni drejtimin e partisë në njërën nga Degët më të rëndësishme në kryeqytet. Duke pasur parasysh se e merrni këtë detyrë kaq të rëndësishme pas dy zgjedhjeve të humbura parlamentare dhe një lokale, cili do të jetë prioriteti Juaj i parë?

Ne kemi një prioritet të gjithë, të risjellim Partinë Demokratike në krye të drejtimit të vendit, për të bërë të mundur shpëtimin e vendit nga kjo organizatë e tipit sicilian që ka zaptuar drejtimin e vendit dhe po i zë frymën gjithë shoqërisë shqiptare.

Por për t’ia arritur kësaj, ne kemi nevojë për një bashkim të madh të çdo kujt. Dhe nuk i referohem vetëm flukseve të brendshme të partisë demokratike dhe burimeve njerëzore, që fatmirësisht Dega 2 i ka të shumta, dhe të cilët nuk kanë nevojë ti ftojë kush se ata janë në shtëpinë e tyre, por i referohem edhe prurjeve të reja dhe afrimeve të intelektualëve të zonës, apo qoftë edhe qytetarëve të thjeshtë të ndershëm që ajo zonë ka.

Pa bashkimin e të gjitha këtyre flukseve në një front të përbashkët që do të duhet qartazi të shkatërrojë modelin e së keqes që na rri përballë, ne nuk mund të arrijmë sukses.

Lulzim Basha ka sjellë një frymë ndryshe në Partinë Demokratike. Meqë Ju nuk jeni një person i katapultuar në Parti dhe formimi juaj intelektual e plotëson atë partiak, çfarë është ajo që i mungon Partisë dhe duhet injektuar me urgjencë, në rrugën drejtë fitores?

Lulzim Basha padyshim që është një frymë ndryshe jo vetëm në Partinë Demokratike, por edhe në të gjithë politikën shqiptare. Është modeli i politikanit të ri, i cili vjen padyshim përcjellës i frymës evropiane në politikë që është respektimi i vlerave, rregullave, ligjeve, institucioneve, stimulimi i promovimit të sa me shumë vlerave dhe figurave përfaqësuese të shoqërisë. Kur flasim për respektim rregullash këtu hyn edhe statuti i Partisë Demokratike. Unë nuk besoj jo vetëm në politikë , por në asnjë fushë të jetës tek katapultat. Besoj fort se suksesi garantohet pasi ke punuar fort por edhe ke gjetur njeriun e duhur për punën e duhur. Kjo vlen edhe për politikën. Karriera politike mbi të gjithë do të duhet të bazohet në një proces meritokracie dhe kush më mirë se mbështetja dhe vota e demokratëve e tregon këtë.

Në këtë frymë pozitive i shoh edhe ndryshimet e statutit të Partisë Demokratike të cilat kanë futur si koncept primaret për herë të parë në Shqipëri.

Shpesh është dëgjuar ndër militantë se nuk ka frymë të fitores. Meqë politika nuk është mjekësi, si mund të kurohet kjo frymë në mënyrë që të rikthehet besimi prej atyre që ëndërronin “Shqipërinë si gjithë Evropa” e deri tek FRPD që sot jeton në një Shqipëri me tjetër diktator?

Unë besoj se fryma nis kur secili nga ne si individ bën një hap para dhe bën diçka. Kushdo prej nesh nqs kupton forcën dhe peshën që ka në shoqëri fryma nis dhe vjen. Psh protesta e djeshme e studentëve është më shume se gjithçka frymë shprese.

Qytetarët e këtij vendi duhet të mësojnë forcën e tyre.

Do të duhet të reagojnë të gjithë me qëllim që jo vetëm kjo qeveri, por çdo qeveri pas kësaj të kuptoj që kur e shkel, populli reagon.

Por kjo do vetëdijësim qytetar. Është fatkeqësi që ka kaq shumë indiferentizëm mes njerëzve. Nuk është e vështirë të japësh mend prej kafeneve të Tiranës, por fjala të zë vend kur edhe ti merr një hap konkret.

Një diktator ndryshe kërkon një rrëzim ndryshe. A mendoni se fundi i Edi Ramës është afër dhe pse?

Mendoj se Rama moralisht ka rënë dhe këtë e di çdo shqiptar e çdo ndërkombëtar edhe pse ndonjë nga këta të fundit bën sikur nuk sheh e dëgjon.

Nuk ka legjitimitet më të rrijë një kryeministër që çdo Ministër i Brendshëm i del i lidhur me drogën apo grupe kriminale të lidhura me drogën.

Nuk ka legjitimitet të qëndrojë në detyrë një kryeministër të cilit drejtuesit e tij politikë nëpër qarqe elektorale i dalin të lidhur me grupet kriminale në kembim të blerjes së votave.

Nuk mund të qëndrojë në këmbë asnjë ditë, asnjë kryeministër, që bën ligje për të shkelur ligje e Kushtetutën e vendit, siç është rasti i ligjit Fusha për Teatrin.

Apo aq më keq akoma një kryeministër, i cili për një aferë të pastër korruptive dhe një vjedhje që po u bëhen 40 milionë euro është i gatshëm të shkelë mbi gra e burra, pleq e fëmijë.

Dhe për këtë arsye në të gjithë Shqipërinë ka vatra protestash të cilat po shtohen me shpejtësi. Dhe unë jam e bindur që shumë shpejtë Rama do të rrëzohet dhe vendi do të çlirohet nga banda “Rilindja”, që bëri atë që as pushtuesit nuk e bënë, që është shpopullimi i vendit.

Në fund, cili është mesazhi për elektoratin tuaj, i cili sot më shumë se kurrë tregoi se vërtetë është demokrat duke i besuar më në fund një demokrateje të rritur në strukturat e PD, dhe pse mos ta themi, meqë jeni kryetarja e vetme e një dege në Shqipëri, dhe një femre?

Dega 2 dhe demokratët e asaj zone ku unë jam lindur e rritur, treguan vërtetë se janë demokrate, janë shpirtra të lirë që nuk i rreshton dot, por ata me mençuri të vënë notën. Dhe kjo është një përgjegjësi e jashtëzakonshme për mua, për besimin që dhanë.

Por do të doja ta kishim të gjithë të qartë se gara mbaroi. Nga sot nuk ka preferenca personale, por ka vetëm PD dhe ne të gjithë pa përjashtim do të duhet të jemi kontribues për të forcuar shtëpinë tonë të përbashkët.

Dhe jam e bindur se kur shpirtrat e lirë bëhen bashkë është vështirë ti thyesh dhe me ndihmën e gjithë secilit e me besim në Zot, besoj se Dega 2 do të dalë faqebardhë në qershor 2019.