Holanda JO Shqipërisë, ky është vendimi i Dhomës së përfaqësuesëve…

Nuk dihet nëse Gjermania dhe Franca mund ti thonë po Shqipërisë, por Holanda është e prerë: Jo! Dhe kjo nuk vlenë vetëm për Shqipërinë por edhe për gjithë Ballkanin: Dhoma e përfaqësuesëve me forcë kundërshton hyrjen e Ballkanit në BE. Kështu shkruan e përditshmja holandeze FD duke konfirmuar kundërshtimin holandez nga përfaqësuesit e saj të popullit para vendimit të Komisionit Evropian në fund të muajit qershor.

“Thuajse të gjitha partitë besojnë se Mali i Zi, Serbia, Maqedonia, Shqipëria, Bosnja dhe Kosova janë shumë larg,” thekson FD duke shtuar se ky konstatim doli gjatë një debati parlamentar me kryeministrin Mark Rutte përpara Samitit të Sofjes.

Deputetët holandezë thanë se Maqedonia e Shqipëria kanë probleme shumë të mëdha, veçanërisht me korrupsionin dhe krimin e organizuar. BE, sipas deputetëve holandezë, duhet të mësojë nga gabimet e të shkuarës, për të mos bërë të njëjtën gjë si me Bullgarinë dhe Rumaninë.

Pro hapjes së negociatave ishte partia D-66, por edhe ajo ishte kundër një anëtarësimi të shpejtë. Megjithatë sipas tyre, çelja e negociatave do të bëjë të mundur që qeveritë e rajonit të respektojnë më shumë parimet demokratike.

Kurse PVV e ekstremit të djathtë tha se nuk bëhet fjalë fare për zgjerim me “Shqipërinë islamike”.

Kryeministri Rutte nga ana e tij tha se ai kërkon që vendet kandidate të plotësojnë strikt kushtet përpara se të ndërmerret ndonjë hap tjetër. Rutte i premtoi parlamentit që do të ndalojë pranimin e përshpejtuar në axhendën e Samitit të Sofjes.